http://www.netgazeti.ge/GE/105/News/17073/კობა დავითაშვილი: კარგი იქნებოდა, თუ ახალციხეს ან ახალქალაქს ავირჩევდით დედაქალაქად
საპარლამენტო უმრავლესობის წევრი კობა დავითაშვილი მიიჩნევს, რომ კარგი იქნება თუ დედაქალაქი თბილისდან ახალციხეში, ან ახალქალაქში იქნება გადატანილი.
დეპუტატის მტკიცებით, ამის მიზეზი გარედან ინსპირირებული სეპარატისტული განწყობებია:
"სამწუხაროდ, ჩვენს მეზობელ სახელმწიფოში ზოგჯერ გაისმის ტერიტორიული პრეტენზიები საქართველოს მიმართ. სწორედ ამიტომ მიმაჩნია, რომ დასამკვიდრებლად იმ რეგიონში ქართული სახელმწიფოებრიობის, რეგიონის განვითარების მიზნითაც, სახელმწიფოებრივი ცხოვრების ცენტრმა გადაინაცვლოს სამცხე–ჯავახეთში. სავსებით ნორმალური და კარგი იქნებოდა, თუკი ჩვენ ან ახალციხეს, ან ახალქალაქს ავირჩევდით დედაქალაქად".
დავითაშვილის განმარტებით, ანალოგიური ლოგიკა, ბევრ ქვეყანაში დაედო დედაქალაქის გადატანას საფუძვლად:
"რუსეთში დიდი ხნის მანძილზე ისმოდა გარკვეული ტერიტორიული პრეტენზიები ყაზახეთის ჩრდილოეთ ნაწილის მიმართ. სწორედ ამიტომ ყაზახეთის ხელისუფლებამ ალმაატიდან ასტანაში გადაიტანა დედაქალაქი. ამაში არის გარკვეული ლოგიკა".
დავითაშვილი სამცხე-ჯავახეთში გამართულ საპროტესტო აქციებსაც იხსენებს:
"რამდენიმე გამოსვლაც მახსოვს ამის თაობაზე და ყოველთვის გარკვეული საფრთხის შემცველი იყო ეს გამოსვლები ქართული სახელმწიფოებრიობისთვის. ამიტომ მე, მაგალითად, სერიოზულად დავფიქრდებოდი ამ საკითხზე და საზოგადოებას ვურჩევდი ამ საკითხზე დაფიქრებას".
აღნიშნული ლოგიკიდან გამომდინარე, დეპუტატი მიიჩნევს, რომ დედაქალაქის ქუთაისში გადატანის აუცილებლობა არ არსებობს. მისი თქმით, ქუთაისი და იმერეთი ქართული ნაციონალიზმის დონორები არიან აღმოსავლეთ საქართველოში:
"ამ თვალსაზრისით ახლა იმერეთში და ქუთაისში ვერანაირ პრობლემას ვერ ვხედავ. პირიქით, ქუთაისი და იმერეთი ყოველთვის იყო ჯანსაღი სახელმწიფოებრივი ქართული ნაციონალიზმის დასაყრდენი კერა და დონორი, ასე ვთქვათ, ქართული ნაციონალიზმისა აღმოსავლეთ საქართველოში და ამ თვალსაზრისით რაიმე აუცილებლობას სახელმწიფოებრივს დედაქალაქის ქუთაისში გადმოტანისა ვერ ვხედავ".
დავითაშვილი გარე საფრთხეებზე აქცენტირებს:
"არამენოფობი არ გახლავარ ნამდვილად და მე კარგად მახსოვს ის დიდი წვლილი, რომელიც სომხებს აქვთ შეტანილი ქართული სახელმწიფოებრიობის მშენებლობაში. მე მიმაჩნია, რომ იგივე თბილისელი სომხები უერთგულესი დასაყრდენი იყო ქართული სახელმწიფოებრიობისა და დღესაც რჩება. ისინი თავს პირველ რიგში თბილისელებად აღიქვამენ, როგორც კავკასიის დედაქალაქის მაცხოვრებლები. სხვათაშორის არა მარტო სომხების შემთხვევაში, მე ვიცი რომ საქართველოდან წასულ აზერბაიჯანელებს ბაქოში ქართველებს ეძახიან. აქედან გამომდინარე, ამ ნიადაგზე დაპირისპირების საფუძველს მე ვერ ვხედავ, მე იგივე ჯავახეთში არსებული სეპარატისტული ტენდეციები უფრო გარედან ინსპირირებული მგონია და ამას სათანადო ყურადღება და სათანადო, ასე ვთქვათ, რეაგირება სჭირდება და ერთ-ერთი საკმაოდ რადიკალურ ზომად ვითარების შეცვლისა, შეიძლება იყოს განხილული დედაქალაქის გადატანაც კი. "
კობა დავითაშვილი: კარგი იქნებოდა, თუ ახალციხეს , ან ახალქალაქს ავირჩევდით დედაქალაქად
