http://frontnews.ge/ge/news/2790
სრულიად საქართველოს კათოლიკოს-პატრიარქ ილია მეორის აზრით, ”სტალინი იყო მორწმუნე, განსაკუთრებით, ბოლო პერიოდში”.

ამის შესახებ პატრიარქმა „Кавказская Политика“–სთვის მიცემულ ინტერვიუში განაცხადა.

”სტალინი ქართველი იყო და ამავდროულად, რუსიც. ის წარმოშობით იყო ქართველი და მშვენივრად იცოდა ქართული ენა, ქართული და საეკლესიო სიმღერები. როცა ის გარდაიცვალა, მე სასულიერო სემინარიის სტუდენტი ვიყავი, ჩვენ ყველა ვიდექით სააქტო დარბაზში და ვტიროდით, როცა მას ასაფლავებდნენ. სტალინზე ბევრს გვიყვებოდა ჩვენი რექტორი მამა კონსტანტინე რუჟიცკი, თვითონ კი, ეს პატრიარქ ალექსი პირველისგან მოისმინა. მოსკოვისა და სრულიად რუსეთის პატრიარქ ალექსი პირველს ძალიან უყვარდა სტალინი. ერთხელ, როცა სტალინმა პატრიარქი სერგი, მიტროპოლიტი ნიკოლაი და პროტოპრესსვიტერი ნიკოლაი კოლჩიცკი მიიღო, მან იკითხა – „რამე ხომ არ გჭირდებათ?“ მათ კი მადლობა გადაუხადეს იმისთვის, რომ ტაძრების გახსნის უფლება მისცა, მან კი უპასუხა, რომ ეს საკმარისი არ იყო და სასულიერო სემინარიებისა და აკადემიების გახსნისკენ მოუწოდა. სტალინი - ეს გამოჩენილი პიროვნებაა, ასეთები იშვიათად იბადებიან, მან იცოდა რუსეთის მსოფლიო მნიშვნელობა”, - აცხადებს პატრიარქი.

ჟურნალისტის კითხვაზე, რა გააკეთა სტალინმა საქართველოსთვის, პატრიარქი პასუხობს, რომ ის არ გამოყოფდა ქართველებს და ყველასთვის ერთნაირი იყო.

”ის ყველასთვის ერთნაირი იყო და ყველას ერთნაირად ექცეოდა. ის არ გამოყოფდა ქართველებს განსაკუთრებულად. მაგრამ მეორე მსოფლიო ომის დროს პროცენტულად ყველაზე მეტი ქართველი დაიღუპა. ის იყო მორწმუნე, განსაკუთრებით ბოლო პერიოდში, მე ასე ვფიქრობ“, - განაცხადა უწმინდესმა.