სააფთიაქო და სუროგატული ნარკომანიის კუთხით არსებული მდგომარეობა შეიძლება შეფასდეს, როგორც კატასტროფული და უკიდურესად შემაშფოთებელი , - ამის შესახებ საქართველოს ჯანდაცვის მინისტრმა დავით სერგეენკომ მთავრობის დღევანდელი სხდომის შემდეგ განაცხადა.
მინისტრის განმარტებით, ქიმიური პრეპარატებით ნარკოტიკული თრობის გამოწვევა უკვე იმდენად იაფი და ხელმისაწვდომი გახდა, რომ მასობრივი ხასიათი მიიღო.
"მრავალთვიანი ანალიტიკური მუშაობის შედეგად ჩვენ შევაჯერეთ კანონპროექტი, რომლის არსიც გამოიხატება შემდეგში - პირველ ეტაპზე ეფედრენის შემცველი მედიკამენტები მეორე ჯგუფიდან გადაინაცვლებს პირველ ჯგუფში, რაც ნიშნავს იმას, რომ მოხდება რეცეპტით მკაცრი გაცემა ნარკოტიკების მსგავსად, გამკაცრდება სანქციები ურეცეპტოდ გაცემაზე და მსგავსი საქციელი დაექვემდებარება სამართლებრივ პასუხისმგებლობას. გარდა ამისა,
ქვეყანაში ბოლო წლებში შემოსულია ათეული მილიონობით ასეთი მედიკამენტი მაშინ, როდესაც რეალურად ათი ათასობით ნაკლები მედიკამენტის საჭიროებაა. სახელმწიფო განსაზღვრავს კვოტებს, რამდენი ასეთი მედიკამენტი უნდა შემოვიდეს ქვეყანაში", - განაცხადა მინისტრმა.
დავით სერგეენკოს შეფასებით, ეს არის ერთადერთი საშუალება იმ უკონტროლო სიტუაციიდან გამოსასვლელად, რომელიც შექმნილია სააფთიაქო და სუროგატებით ნარკმანიის მიმართულებით.
"დღეისათვის, თუ რომელიმე დაწესებულებას დაუფიქსირდა რეცეპტით გასაცემი მედიკამენტის ურეცეპტოდ გაცემა, პირველ ეტაპზე არის ფინანსური ჯარიმა და შემდეგ ზრდადი ეტაპებით უჩერდება ლიცენზია. თუმცა, იძებნებოდა სწრაფი გამოსავალი, როდესაც იგივე ადამიანები ერთი დღის განმავლობაში აფუზნებდნენ სხვა იურიდიულ პირს და განაგრძობდნენ იმავე ქმედებებს და არ არსებობდა კანონი, რომელიც ამას აკრძალავდა. ახალი კანონპროექტით, სააფთიაქო დაწესებულების მფლობელს 10-15 წლით საერთოდ აეკრძალება ანალოგიური საქმიანობა, სამართლებრივ პასუხისმგებლობაზე კი პარლამენტი იმსჯელებს", - აღნიშნა სერგეენკომ.
ჯანდაცვის მინისტრი იმედოვნებს, რომ საკითხის აქტუალობიდან გამომდინარე, კანონპროექტს პარლამენტი მოკლე ვადებში დამტკიცებს.
http://www.interpressnews.ge/ge/samartali/...thi-miigho.html 
აფთიაქების მუშაობა მკაცრად გაკონტროლდება, ატ კაიფა ლიუდი უმირაიუტ - დ. სერგეენკო
