რას ნიშნავს ეს საქართველოსთვის? ყველაზე მეტად მიმდინარე კრიზისი საქართველოს ფულადი გზავნილების არხით შეეხება. მოგეხსენებათ, რუსეთი ფულადი გზავნილების გამომგზავნ ქვეყნებში უპირობო ლიდერია და ამ ქვეყნიდან საქართველოში 2013 წელს მილიარდ ნახევარ დოლარამდეა შემოსული, რაც საქართველოს მშპ-ს 10 პროცენტია. გასულ წელს ყოველთვიურმა საშუალო ჩარიცხვებმა 123 მილიონი აშშ დოლარი შეადგინა. ნოემბრის მდგომარეობით, წინა წლის ნოემბერთან შედარებით, გზავნილების ნაკადი 20 პროცენტით არის შემცირებული და 104,2 მლნ აშშ დოლარს აღწევს. ფულადი გზავნილები საქართველოსთვის საერთაშორისო ვალუტის მნიშვნელოვან წყაროს წარმოადგენს და მრავალი ოჯახისთვის შემოსავლის წყაროა. თუ გავითვალისწინებთ, რომ რუსეთში მცხოვრებ ქართველებს მიმდინარე პროცესების გამო განკარგვადი შემოსავალი შეუმცირდებათ, ამ ქვეყნიდან უნდა ველოდოთ გზავნილების მნიშვნელოვან შემცირებას. ამას ისიც ემატება, რომ რუსულ ბანკებში უცხოური ვალუტის გაცემაზე უკვე დაწესებულია გარკვეული შეზღუდვები. კერძოდ, „სბერბანკში“ შესაძლებელია მხოლოდ ორი ათასი დოლარის ყიდვა, ისიც თუ დილით ადრე მიუსწრებს მომხმარებელი.

რუსეთში მიმდინარე მოვლენები საქართველოზე გავლენას ექსპორტის მიმართულებითაც იქონიებს. მიუხედავად იმისა, რომ რუსეთი საქართველოს მთლიან ექსპორტში მხოლოდ 10 პროცენტს იკავებს, თანხობრივად ეს 242.5 მლნ აშშ დოლარია და განსაკუთრებით დააზარალებს სოფლის მეურნეობის პროდუქციისა და სურსათის ექსპორტიორებს. ექსპორტიორებისთვის რეკომენდებულია საექსპორტო ბაზრების დივერსიფიკაცია და ნაკლებად დამოკიდებულება რუსეთის არასტაბილურ ბაზარზე. რაც შეეხება ფულად გზავნილებს, ამ მიმართულებით ალტერნატიული ბაზრების მოძიება, რა თქმა უნდა, გაცილებით უფრო რთული იქნება.




წყარო:http://www.tavisupleba.org/content/rusetis-krizisis-gavlena/26760881.html