საბჭოთა ეპოქიდან ახალი გამოსულები ვიყავით და რასაც მიჩვეულები ვიყავით ის გავაკეთეთ. ჰოდა ევროპამ გვითხრა, სად ბანაობთ, აქ თამაშის სხვა წესებიაო
აბა ეს გადაიკითხე, ფეისბუკზე ”დინამოს” ერთ-ერთი გვერდიდან გადმოვაკოპირე:
სამი ვერსია
18 აგვისტოს ,,დინამო“ – ,,ლინფილდის“ მატჩის წინ მსაჯებთან და მატჩის კომისართან მივიდა კაცი, რომელმაც თავი ,,დინამოს“ წარმომადგენლად გააცნო და 5 000 დოლარი შესთავაზა მათ ,,დინამოს“ დახმარების სანაცვლოდ. მისი წინადადება არ მიიღეს.
ფირმა ,,ბანი და კომპანიის“ პრეზიდენტმა ბადრი ნინუამ 5 000 დოლარი კომპანიის საფირმო კონვერტებით ათიოდე მოწმის, მათ შორის მატჩის კომისრის, თანდასწრებით გადასცა მსაჯებს, როგორც სამივლინებო ხარჯების საზღაური.
სასტუმრო ,,მეტეხში“ მეგობრული ვახშმის შემდეგ ბადრი ნინუამ საკუთარი ,,მერსედესით“ წაიყვანა მსაჯები კრწანისის სამთავრობო რეზიდენციაში და გზად ფული გადასცა. მსაჯებმა თანხა გადაითვალეს და თქვეს: ო’კეი.
პარასკევი
17:00. ,,დინამოში“ კოპენჰაგენიდან ფაქსი მოვიდა: 13 სექტემბერს ჩამოვდივართ, გთხოვთ ,,მეტეხში“ გვაცხოვროთ და თამაში საღამოს რვა საათზე დაიწყოთო.
20:45. შევიტყვეთ ,,ფრანს პრესის“ გადმოცემული ინფორმაცია: უეფას სადისციპლინო კომისიამ მოხსნა თბილისის ,,დინამო“ ჩემპიონთა თასის წლევანდელი გათამაშებიდან 18 აგვისტოს მატჩის წინ მსაჯების მოქრთამვის მცდელობის გამო. ,,დინამო“ ვერ მიიღებს მონაწილეობას 1994–95 სეზონის ევროტურნირებშიც, თუ მან ამის უფლება მოიპოვა. ,,დინამოს“ შეუძლია აპელაცია შეიტანოს არაუგვიანეს 6 სექტემბრის შუაღამისა.
21:45. ჩვენი კორესპონდენტი უკვე დიღმის ბაზაზეა. იქ მყოფი ფეხბურთელებისთვისაც ეს ცნობა მოულოდნელობაა. ათიოდ წუთში მანქანით მოვიდა შოთა არველაძე, რომელიც ლამის ტიროდა, გუნდის ხელმღვანელები აწყნარებენ ფეხბურთელებს, თუმცა კარგ დღეში, რასაკვირველია, არც თვითონ არიან. დიღომში მცხოვრებ გულშემატკივრებს სახლში რა გააჩერებდათ და ბაზაზე უკვე საკმაო ხალხია. მათ გუნდის ადმინისტრატორი გია იმნაძე ელაპარაკება და სწორედ მისი ლაპარაკიდან შევიტყვეთ, რომ საქმე დღიურ თანხას ეხება.
22:50. ტელევიზიის პირველი არხით საქმის ვითარებაზე საუბრობენ დავით ქლიბაძე და ,,დინამოს“ დირექტორატის წევრი ნუკრი კაკილაშვილი. ირკვევა, რომ უეფადან გამოგზავნილი ფაქსის საფუძველზე მსაჯებისთვის დღიური ,,დინამოს“ უნდა გადაეხადა, მაგრამ ზუსტი თანხა არ იყო მითითებული. ,,დინამოს“ ვიცე–პრეზიდენტი გია სვანაძემ სთხოვა (წერილობით) ,,ბანი და კომპანიის“ პრეზიდენტს ბადრი ნინუას გადაეხადა მსაჯებისთვის 5 ათასი დოლარი – მთავარ მსაჯს 2 000 (დღეში 500), ორ გვერდითს და სარეზერვოს – ათას–ათასი (დღეში – 250). წერილის ბოლოს მითითებული იყო, რომ საბოლოო ანგარიშწორების თანხა ,,დინამოს“ დაეწერებოდა. გადაცემის დროს ითქვა, რომ ბადრი ნინუამ ეს თანხა კომპანიის საფირმო კონვერტებით ათიოდე მოწმის, მათ შორის მატჩის კომისრის თანდასწრებით გადასცა მსაჯებს.
შაბათი
მოსკოვის ,,სპორტ–ექსპრესში“ გამოქვეყნდა გაზეთის კორესპონდენტის სატელეფონო ინტერვიუ უეფას დისციპლინარული დეპარტამენტის წარმომადგენელ გორან სავიჩთან.
კითხვა: ასეთი სერიოზული გადაწყვეტილების მისაღებად, უეფა, ალბათ, დეტალურად უნდა იყოს ინფორმირებული იმის შესახებ, თუ სად, როდის და ვინ მოახდინა ქრთამის მიცემის მცდელობა...
პასუხი: რასაკვირველია, დისციპლინარულმა კომისიამ საფუძვლიანად შეისწავლა ის, თუ რა გარემოებაში მოხდა ეს. 18 აგვისტოს მატჩის წინ მსაჯებთან და უეფას ოფიციალურ დელეგატთან მივიდა კაცი, რომელმაც თავი ,,დინამოს“ წარმომადგენლად გააცნო და შესთავაზა 5 ათასი დოლარი ,,დინამოს“ მოგებისთვის დახმარებაში. მისი წინადადება კატეგორიულად უარყოფილი იქნა და უკვე მეორე დღეს უეფას სამდივნოს ეცნობა. იქვე შემოვიდა მსაჯის პატაკიც.
კითხვა: ამის შესახებ თბილისში როდის გახდა ცნობილი?
პასუხი: მას შემდეგ, რაც ჩვენ შევისწავლეთ მსაჯის პატაკი და მივხვდით, რომ ბრალდება მოსყიდვის შესახებ საკმაოდ სერიოზული იყო, უეფას წარმომადგენელი დაუკავშირდა ,,დინამოს“ პრეზიდენტს მერაბ ჟორდანიას.
კითხვა: როგორი იყო ჟორდანიას რეაქცია?
პასუხი: მან კატეგორიულად უარყო იმის შესაძლებლობა, რომ მოსყიდვის მცდელობა ,,დინამოს“ წარმომადგენელისგან მოდიოდა.
კითხვა: მაგრა ის, რომ მცდელობას ჰქონდა ადგილი, მან იცოდა?
პასუხი: დიახ.
კითხვა: თქვენ არ უშვებთ იმას, რომ ჟორდანია მართალია, რომ ქრთამის შემაძლეველს ,,დინამოსთან“ არავითარი კავშირი არ ჰქონდა?
პასუხი: შესაძლებელია, მაგრამ მიუხედავად ამისა, ბრალი მაინც ,,დინამოს“ მიუძღვის, რეგლამენტის თანახმად ხომ მასპინძელთა კლუბია იმაზე პასუხისმგებელი, რაც მატჩის წინ, მატჩის დროს და მატჩის შემდეგ ხდება.
კითხვა: უეფამ იცის, თუ ვინ შესთავაზა ქრთამი მსაჯებს?
პასუხი: დიახ, ჩვენ ვიცით მისი სახელი, გვარი და მისამართიც კი, მაგრამ სანამ საქმის გარჩევა მიდის, მისი დასახელების უფლება არ გამაჩნია.
კითხვა: ,,დინამომ“ უკვე შეიტანა აპელაცია?
პასუხი: ჯერ არა, მაგრამ ჩვენ შეგვატყობინეს, რომ უახლოეს საათებში აპელაცია უეფაში იქნება.
კითხვა: როდისაა აპელაციის შეტანის ბოლო ვადა?
პასუხი: 6 სექტემბრის შუა ღამე.
კითხვა: როდის განიხილება აპელაცია?
პასუხი: 11 სექტემბერს სააპელაციო კომისიის სხდომაზე. მისი გადაწყვეტილება საბოლოო იქნება.
კითხვა: ,,დინამოს“ რომ ,,ლინფილდთან“ წაეგო, უეფა მაინც აღძრავდა ამ საქმეს?
პასუხი: ასეთ შემთხვევაში უეფას პოზიცია უცვლელია, ჩვენ მივიღეთ ცნობა მოსყიდვის მცდელობაზე და ვალდებული ვართ გამოვიკვლიოთ.
11:00. დიღმის ბაზაზე არაფერი ახალი არ იციან. საცოდავი სანახავები არიან ფეხბურთელები. ერთი ზოიძე ცდილობს ხასიათის გამოსწორებას – მან ხომ ახალი მანქანა იყიდა. კლუბის დირექტორატის წევრი უჩა მალაზონია სიგარეტს სიგარეტზე ეწევა და სიმწრისგან ბაზის პერსონალს ხან რას ავალებს და ხან რას. ედუარდ შევარდნაძეს განზრახული აქვს უეფას პრეზიდენტს ლენარტ იუჰანსონს წერილი მიწეროს, რასაც აკეთებს კიევაც. ზოგი იმასაც იძახის, შევარდნაძე ტელეფონით თურქეთის პრეზიდენტს ელაპარაკაო.
13:30. უნდა გაფრინდეს თბილისი–ფრანკფურტის რეისი. როგორც შევიტყვეთ, თვითმფრინავში ბადრი ნინუა იმყოფება. იგი შვეიცარიაში წასვლას აპირებს. მას წინა ღამით უკვე უსაუბრია თავის უცხოელ ადვოკატებთან.
18:15 მეორე არხის საინფორმაციო გამოშვება იუწყება, რომ ,,დინამოსა“ და ,,ბანის“ პრეზიდენტის ინტერესებს აპელაციაზე 6 ადვოკატი დაიცავს. სამი ,,დინამოსი“ და სამიც ნინუას ადვოკატები.
21.50 BBC-სთვის მიცემულ ინტერვიუში ,,ლინფილდის“ მდივანმა დერი ბრუკმა განაცხადა, რომ კლუბს წარმოდგენაც არ ჰქონდა, თუ ვინმე ვინმეს ქრთამავდა: ,,ჩვენ თბილისის მატჩში მსაჯობის წინააღმდეგ პრეტენზიის საბაბი არ გვქონია და საერთოდ, იქ რომ დავმარცხდით, ჩვენს გარდა ვერავის დავაბრალებთ. პირიქით, პირველი მატჩის შემდეგ მსაჯობა შევაქეთ კიდეც“. BBC–ს კორესპონდენტის კითხვაზე, თუ რა რეაქცია გამოიწვია იმან, რომ ახლა ,,ლინფილდი“ ხვდება ,,კოპენჰაგენს“, დერი ბრუკი პასუხობს: ტელეფონი გაუთავებლად რეკავდა – გულშემატკივრებს აინტერესებდათ, მართალი იყო თუ არა ეს ინფორმაცია. ჩვენ დაბნეულები ვიყავით, რადგან ვერც წარმოგვედგინა, რომ ისეთი გუნდი, როგორიც თბილისის ,,დინამოა“, მსაჯების მოქრთამვას იკადრებდა. კითხვას – შეგიძლიათ მომხდარს ირლანდიელთა იღბალი უწოდოთ? – ,,ლინფილდის“ მდივანმა უპასუხა: შეგიძლიათ ირლანდიელთა იღბალი უწოდოთ, შეგიძლიათ – ,,ლინფილდის“, ვისაც რა სურს, ის დაარქვას.
შუაღამის შემდეგ თბილისში ჩამოფრინდნენ მერაბ ჟორდანია და ნოდარ ახალკაცი, რომლებიც შვეიცარიაში იმყოფებოდნენ.
კვირა
16.00 ნოდარ ახალკაცი ინტერვიუს აძლევს ამერიკულ ტელეკომპანია WTN-ის წარმომადგენლებს: როგორც კი გავიგეთ, რომ მსაჯები თურქეთიდან იყვნენ, თურქეთის ფეხბურთის ფედერაციაში წერილი გავაგზავნეთ, სადაც ვთავაზობდით ჩვენი მანქანით ტრაპიზონში ჩასვლას და მათ ბათუმში ჩამოყვანას, საიდანაც თბილისში გადმოფრინდებოდნენ, მაგრამ მათ პასუხის ღირსადაც არ ჩაგვთვალეს. მას შემდეგ მოვიდა უეფას ფაქსი, სადაც ეწერა, რომ მსაჯები თურქეთიდან ჯერ ვენაში, იქიდან მოსკოვში ჩავიდოდნენ და 17 აგვისტოს თბილისში ჩამოვიდოდნენ. მართალია, ფაქსში ეწერა, რომ ჩვენი ჩასვლა მოსკოვში აუცილებელი არ იყო, მაინც გადავწყვითეთ იქ ჩვენი წარმომადგენლების გაგზავნა. ამის მიზეზი ის იყო, რომ ჩვენ უეფას სიტყვა მივეცით – მატჩის ყველა მონაწილე ჩვენთან დროულად ჩამოვაო. მოსკოვში ჩავიდნენ ავთო კოკაია და თურქული ენის მცოდნე ზაურ მჭედლიშვილი. ისინი აეროპორტში დახვდნენ თურქ მსაჯებს და სასტუმრო ,,პენტაში“ წაიყვანეს, აქ მსაჯებმა უარი თქვეს ფულის გადახდაზე. ჩვენმა წარმომადგენლებმა ისინი სასტუმრო ,,რედისონში“ გადაიყვანეს და იქ მოათავსეს, მსაჯებმა თქვეს: თუ ფულს არ გადაგვიხდით, უკან დავბუნდებითო და ჩვენებს სასტუმროში ფულის გადახდა მოუწიათ. ამ გადახდილი თანხის საბუთი გვაქვს და უეფაშიც წარვადგინეთ, მაგრამ ზედაც არ დახედეს. თბილისში მსაჯებს აეროპორტში დახვდნენ და კრწანისის სამთავრობო რეზიდენციაში წავიყვანეთ, სადაც მათ უნდა ეცხოვრათ, ოთახში მე უეფას ოფიციალურ დელეგატს კარლ ფერტონგენს ვაჩვენე 10 აგვისტოს მიღებული ფაქსი. მას გაუკვირდა, რომ დღიურის გადახდას ჩვენ გვავალებდნენ და თქვა: თუ ასეა, მიეცითო. მეორე დღეს, სასტუმრო ,,მეტეხში“ მეგობრული ლანჩის (მასზე მსაჯები, კომისარი, ,,ლინფილდის“ წარმომადგენლები და ,,კოპენჰაგენის“ მწვრთნელი იყვნენ) შემდეგ ბადრი ნინუამ საკუთარი ,,მერსედესით“ წაიყვანა მსაჯები კრწანისის სამთავრობო რეზიდენციაში. გზაში მან გადასცა ფული მსაჯებს. მათ დათვალეს და თქვეს: ოკეი.
ახალკაცის თქმით, მსაჯების თბილისში ყოფნის დროს, მათ ყველა სურვილი შეუსრულეს, გარდა ერთისა: თურქებმა თხოვნით მიმართეს ,,დინამოს“ წარმომადგენლებს, რათა ,,დინამოს“ ფორმის ოთხი კომპლექტი მიეცათ მათთვის, მაგრამ ამაზე უარი უთხრეს. ინტერვიუს ბოლოს ახალკაცმა უეფას გადაწყვეტილებას თბილისის ,,დინამოს“ და მთელი ერის დისკრიმინაცია უწოდა.
21.20. ტელეფონით დავუკავშირდი საქართველოს ფეხბურთის მსაჯთა ასოციაციის პრეზიდენტს ავთო კოკაიას, რომელიც თარჯიმანთან ერთად მოსკოვში დახვდა თურქ მსაჯებს.
ბატონმა ავთომ თქვა, რომ ისინი აეროპორტშივე დახვდნენ მსაჯებს და სასტუმრო ,,პენტაში“ წაიყვანეს, მაგრამ ვინაიდან ის ძალიან ძვირი გამოდგა (დაახლოებით 300 დოლარი კაცზე), ამიტომ მსაჯები ,,რედისონში“ (ყოფილი ,,სლავიანსკაია“) დააბინავეს. ჩემს შეკითხვაზე, იყო თუ არა მსაჯების მხრიდან მუქარა – თუ არ გადაგვიხდით ფულს, უკან წავალთო – კოკაიამ კატეგორიულად განაცხადა: მსგავსი არაფერი ყოფილაო. ბატონ ავთოს თქმით, მათ საღამოს თურქები არბატზე მდებარე ქართულ ცენტრში ჰყავდათ, მეორე დილით კი აეროპორტში წაიყვანეს და თუმცა, რეისმა სამი საათით დააგვიანა, თბილისში დროზე ჩამოვედით. მას შემდეგ მე მათთან კავშირი აღარ მქონია – თქვა კოკაიამ.
22.04. საქართველოს ტელევიზიის I და II არხით დაიწყო მერაბ ჟორდანიას გამოსვლა. თუმცა სტუდიაში საქართველოს ადვოკატთა კოლეგიის წევრი შალვა რჩეულიშვილიც იმყოფება, მთავარი მაინც ჟორდანიას გამოსვლაა. მან თქვა, რომ ბელფასტში წასვლამდე სამი დღით ადრე მიიღო ცნობა უეფადან, სადაც ამ ,,ქრთამის“ შესახებ იყო საუბარი და სადაც ეწერა, რომ 3 სექტემბერს ,,დინამოს“ პრეზიდენტი სადისციპლინო კომისიის სხდომაზე უნდა გამოცხადებულიყო. ჟორდანიას თქმით, მან ეს არასერიოზულად მიიჩნია და არავის გააგებინა, რათა ამას ფეხბურთელებზე არ ემოქმედა განმეორებითი მატჩის წინ. შემდეგ მან თითქმის იგივე გაიმეორა, რაც ახალკაცმა, მაგრამ მისი ვერსიით, ბელგიელ კომისარს ჰკითხეს – მსაჯებს რამდენი მივცეთო და მან – თვითონ გეტყვიანო – უპასუხა. პარასკევის სხდომის შესახებ ბატონმა მერაბმა თქვა, რომ სხდომის წინ უეფას გენერალურმა მდივანმა აიგნერმა აღიარა, რომ 10 აგვისტოს გამოგზავნილი ფაქსი შეცდომა იყო. თავად სხდომაზე კი მერაბს არ მისცეს საშუალება თავისი არგუმენტები მოეყვანა და მხოლოდ კითხვაზე უპასუხეო – უთხრეს, ხოლო ნოდარ ახალკაცს საერთოდ ხმა არ ამოაღებინეს. გადაცემის მსვლელობისას შევიტყვეთ, რომ დაქირავებულია 6 ადვოკატი, რომელთაც 120 ათასი დოლარი უნდა გადაუხადოს ,,დინამომ“ საქმის ნებისმიერი ვარიანტით დამთავრების მიუხედავად.
ორშაბათი
14.00. როგორც შევიტყვეთ, აპელაციის ტექსტი ჯერ არ არის გაგზავნილი.
16.40. საერთაშორისო სატელეფონო სადგურის თანამშრომლებმა ბერნს დაგვაკავშირეს. მორიგეს ვთხოვეთ, რომ იურიდიული დეპარტამენტის რომელიმე წარმომადგენელი დაგვლაპარაკებოდა. ყურმილი გორან სავიჩმა აიღო:
-გამარჯობათ, გაზეთი ,,სარბიელი“ გაწუხებთ. თანახმა ხართ თბილისის ,,დინამოს“ საქმის გარშემო ორიოდ კითხვაზე გვიპასუხოთ?
–დიახ.
–ჩვენ ვიცით, რომ 10 აგვისტოს გამოგზავნილ ფაქსში უეფას გენერალური სამდივნო ავალდებულებდა ,,დინამოს“ მსაჯებისთვის დღიური გასამრჯელო მიეცათ. ეს სიმართლეა?
–არა. იმ ფაქსში ეწერა, რომ ფული მასპინძლებს იმ შემთხვევაში უნდა მიეცათ, თუ ამას, მსაჯები მოითხოვდნენ, ყოველ შემთხვევაში, ის თანხა, რომელიც მსაჯებს გადასცეს, გაცილებით აღემატებოდა დადგენილ ნორმებს.
–,,სპორტ–ექსპრესისთვის“ მიცემულ ინტერვიუში თქვენ ამბობთ, რომ ,,მსაჯების მიერ ეს წინადადება კატეგორიულად უარყოფილი იქნა“. მათ ფული არ აუღიათ?
–ფული რომ აიღეს, ეს მათი მხრიდან გამართლებული საქციელი იყო. ქრთამის მიცემის მცდელობა, მსაჯებმა ფული აიღეს და პირველივე ხელსაყრელ მომენტში უეფას ოფიციალურ დელეგატს შეატყობინეს.
–თუ მიიღეთ ,,დინამოს“ აპელაცია?
–არა, მაგრამ ჯერ კიდევ არის დრო.
–თქვენი აზრით, აქვს თუ არა ,,დინამოს“ ამ საქმის მოგების შანსი?
–ბოდიში, მაგრამ ამ კითხვაზე პასუხს ვერ გაგცემთ.
12.20. ,,ბანი და კომპანიის“ ოფისიდან, სადაც იმყოფებიან მერაბ ჟორდანია და ნოდარ ახალკაცი, უეფაში ფაქსი გაიგზავნა. აპელაციის მოკლე შინაარსი ასეთია. არ ვეთანხმებით დისციპლინარული კომისიის გადაწყვეტილებას, გვაქვს უამრავი არგუმენტი ჩვენს სასარგებლოდ, რომელთაც ადგილზე წარმოგიდგენთ.
19.30. იმავე ოფისში შევხვდი ჟორდანიას და ვთხოვე, კიდევ ერთხელ დაეზუსტებინა ის მომენტი, როცა კომისარს უეფადან მიღებული ფაქსი აჩვენეს. ,,კომისარმაც და მსაჯმაც იცოდნენ, რომ ფული უნდა მოგვეცა ,,მეტეხში“ გამართულ სადილზე. ჩვენ მათ ვუთხარით, რომ ეხლა სასტუმროში რომ წაგიყვანთ, ის კაცი მოგცემთ ფულსო“ – თქვა ჟორდანიამ.
როდის მიფრინავთ შვეიცარიაში?
–ხვალ ან ზეგ.
ასეთი იყო მომხდარი ამბების ქრონოლოგია ,,დინამოს“ დისკვალიფიკაციის გამოცხადებიდან გუშინ საღამომდე. თითქოს ბევრი რამ შევიტყვეთ, მაგრამ სინამდვილეში როგორ იყო საქმე, ამაზე პასუხის გაცემა მაინც გვიჭირს. გამოიკვეთა ორი ვერსია – ,,დინამოსი“ და უეფასი, ანუ ქართული და თურქულ–შვეიცარიული. პირველის მიხედვით ბადრი ნინუამ უეფას მოთხოვნის შესაბამისად დღიური გასამრჯელო გადასცა მსაჯებს. მეორეს თუ დავუჯერებთ, იგივე ნინუას 5 ათას დოლარად მსაჯების მოსყიდვა სდომნია. ეს ორი ვერსია შეეჯახება ერთმანეთს შაბათს, 6 საათზე უეფას სააპელაციო კომისიის სხდომაზე და რომელი გაიმარჯვებს, კაცმა არ იცის. ისე კი, ზედიზედ ორი აპელაციის მოგება უეფასთან არნახული საქმეა, მაგრამ მთელ საქართველოს რომ 120 ათას დოლარად დაქირავებული ექვსი ადვოკატის იმედი აქვს, ესეც ნაღდია.
პირველი აზრი, რომელიც ამ საქმის შემხედვარე კაცს გაგიჩნდება, ისაა, რომ ისჯება სრულიად უდანაშაულო გუნდი. დიახ, გუნდი, და არა კლუბი. სწორედ ფეხბურთელები არიან ყველაზე ცოდონი. თუმცა, რატომ ისინი? ბოლოსდაბოლოს, ფეხბურთელები უცხოეთში წავლენ და იქ ითამაშებენ დიდ ფეხბურთს, მაგრამ რა ქნას გულშემატკივარმა? ისიც ხომ ვერ წავა? ამ საქმის საბოლოო შედეგზე ბევრადაა დამოკიდებული მთლიანად ქართული ფეხბურთის ბედი.
ევროპული ტურნირების ისტორიაში ასეთი განაჩენით ჯერ არავინ მოუხსნიათ, რატომ მივიდა საქმე ასეთ სამარცხვინო გამოძევებამდე? ის, რომ უეფა ამ საქმეში მთლად მართალი არა რის, ფაქტია, ამ სოლიდურ ორგანიზაციას არ ეკადრება ისეთ ამბავში ,,ჩაჭრა“, რომელსაც ნებისმიერი კოოპერატივი წარმატებით გაართმევს თავს. თუ წერ გადაუხვიეო, მაშინ მიაწერე, რამდენი. მაგრამ უეფა უეფაა. ის არასდროს აღიარებს ამ შეცდომას და თუ აღიარებს, მხოლოდ კულისებში. მთელი საფეხბურთო მსოფლიოსთვის თბილისის ,,დინამო“ დარჩება იმ კლუბად, რომელიც 5 ათას დოლარად აპირებდა მსაჯის მოქრთამვას.
ჩემი აზრით, ეს ქრთამი არ არის. მაგრამ, სამწუხაროდ, ეს მხოლოდ ჩემი აზრით. შეიძლება, არის კიდეც, თუმცა ვერსიებს თუ მივყვებით, ასობით შეიძლება ჩამოთვლა. ზოგი ამბობს, რომ უეფას და ბევრ სახელგანთქმულ კლუბს არ აწყობთ ასეთი ძლიერი აღმოსავლეთევროპული გუნდი ჩემპიონთა ლიგაში (შეიძლება!), ზოგი – რომ თურქეთში მცხოვრებმა აფხაზებმა ,,იჩალიჩეს“ რამე. ყველას თავისი ვერსია გააჩნია.
მაგრამ მოდით ჩვენ თავს მოვკითხოთ პასუხი. ოთხი დღეა ნერვებდაწყვეტილი დადის ისედაც გაუბედურებული ხალხი, მაგრამ ერთი არ იტყვის – რაღაცა ჩვენი ბრალიცააო. ადვოკატიც კი იმას იძახის, იქნებ მსაჯებს ,,ლინფილდმა“ მისცა რამეო. ხშირად გაისმის ტელეეკრანიდან – ქართველებს ქრთამის მიცემას როგორ გვასწავლიანო – თითქოს საამაყო იყოს. საფირმო კონვერტში რომ ჭკუათამყოფელი კაცი ქრთამს არავის მისცემს, ნათელია, მაგრამ ჩემპიონთა თასის მატჩზე ჩამოსულ მსაჯთა ბრიგადას მანქანში რომ მისცემ ფულს, თანაც ,,ინგლისურში რომ მოიკოჭლებს“ ის კაცი – დამეთანხმებით, არც ესაა მთლად ცივილიზებული მეთოდი. ანდა რა იყო ეს მოსკოვში წასვლა? ვეთანხმები – მსაჯები რომ დროზე ჩამოსულიყვნენ, ამისთვის მოსკოვშიც უნდა წასულიყვნენ და თუ საჭირო იქნებოდა, მადაგასკარშიც, მაგრამ სასტუმროში ფულის გადახდა (სანდო წყაროებით, დაახლოებით 800 დოლარი) დააჩქარებდა მათ ჩამოსვლას? ის, რომ მსაჯებმა ქვა ააგდეს და თავი შეუშვირეს – ჩქარა გადაიხადეთ, თორემ წავალთო, არარეალურად მეჩვენება: ჩვენი წარმომადგენლები რომ არ ჩასულიყვნენ, მაშინ რას იზამდნენ, ბიშოვეცს ან სადირინს ხომ არ გამოართმევდნენ ფულს? თუმცა, კიდევ ვიმეორებ, საქმის ნამდვილ ვითარებას ჩვენ კიდევ კარგა ხანი ვერ გავიგებთ, თუ საერთოდ როდესმე გავიგებთ. ახლა ყველაზე მეტს, რა თქმა უნდა, ნინუა იბრძვის. მან უდანაშაულო გუნდის დაშვებასთან ერთად თავის სახელსაც უნდა ჩამოწმინდოს მოცხებული ჩირქი. როგორც ტელევიზიით გამოსვლაში ადვოკატთა კოლეგიის წევრები შალვა რჩეულიშვილმა თქვა, ,,უფა (ასე თქვა) გამოძიებას უნდა დალოდებოდა“. ე.ი. საქართველოს პროკურატურამაც უნდა აღძრას საქმე?
ისე, არ ჯობდა, ფული მსაჯებისთვის მერაბ ჟორდანიას გადაეცა? სხვა თუ არაფერი, მერაბი კარგად ლაპარაკობს ინგლისურად და იმას მაინც აუხსნიდა, რომ ეს ფული მათი კუთვნილი სამივლინებო გასამრჯელო იყო. დარწმუნებული ვარ, ხუთი კი არა, ათი ათასიც რომ მიეცა ჟორდანიას, არაფერი მოხდებოდა – უბრალოდ, ზედმეტ თანხას დააბრუნებდნენ... მაგრამ კიდევ ერთხელ, მერამდენედ ვიმეორებ, რომ, როგორც იტყვიან კაცმა არ იცის, რა მოხდება და ვინაა დამნაშავე: ნინუა, ჟორდანია, ახალკაცი, უეფა, თურქები, რუსები, ოსები, აფხაზები თუ ვინმე სხვა.
არადა, ამ უბედურ ქვეყანას კიდევ ეს უნდოდა? რაც იტალიურ კლუბებს მსაჯებისთვის უჩუქებიათ ანდა რამდენი თვით ფიფას ვიცე–პრეზიდენტ კოლოსკოვს ვინემსთვის უფეშქაშია, იმდენი სიცოცხლე ჩვენ და ჩვენს მკითხველებს.
This post has been edited by kobakaxeti on 24 Feb 2015, 19:04 
· 
დინამო - ლინფილდის სკანდალი
