http://cp.ge/ge/statiacci.php?ID=39466
მიმდინარე წელს საქართველოს საპატრიარქომ სუბსიდიის სახით ბიუჯეტიდან 25-მილიონიანი დაფინანსება მიღო. 2002 წლის 14 ოქტომბერს გაფორმებული ხელშეკრულების თანახმად, საბჭოთა რეჟიმისგან მიყენებული ზიანის ასანაზღაურებლად, სახელმწიფო საპატრიარქოს, კომპენსაციის სახით, ყოველწლიურად 25 მილიონ ლარს ურიცხავს. აღნიშნული ხელშეკრულების საფუძველზე, საქართველოს მართლმადიდებელი ეკლესია გადასახადებისგანაც გათავისუფლებულია და მის ბალანსზე ჩარიცხული თანხების მიზნობრიობასაც თავად განკარგავს.
ეკლესიის დაფინანსების კიდევ ერთ წყაროს ადგილობრივი მუნიციპალიტეტები წარმოადგენენ, რომლებიც საპატრიარქოს ბალანსზე ყოველწიურად საკმაოდ მნიშვნელოვან თანხებს რიცხავენ.
‘’სივილ პრესის’’ მიერ გამოთხოვილი ინფორმაციის თანახმად, 2014 წელს დედაქალაქის ბიუჯეტიდან საპატრიარქოს 15 000 ლარი გადაერიცხა, პრეზიდენტის და მთავრობის სარეზერვო ფონდებიდან გადარიცხულმა თანხებმა კი 650 000 ლარი შეადგინა.
„ადამიანის უფლებების სწავლებისა და მონიტორინგის ცენტრის“ (EMC) და „ტოლერანტობისა და მრავალფეროვნების“ (TDI) ერთობლივი კვლევის შედეგების მიხედვით კი ირკვევა, რომ 2002 წლიდან დღემდე ხელისუფლების მიერ სახელმწიფო ბიუჯეტიდან საპატრიარქოსთვის გადარიცხულმა თანხებმა 250 მილიონ ლარს გადააჭარბა.
2007-2013 წლებში პრეზიდენტის სარეზერვო ფონდიდან მართლმადიდებელმა ეკლესიამ 10 806 207 ლარი მიიღო.
რაც შეეხება თვითმმართველი ქალაქებიდან (თბილისი, რუსთავი, ქუთაისი) საპატრიარქოს ბალანსზე გადარიცხულ თანხებს, საპატრიარქოს დაფინანსებისთვის 2013 წელს 1 666 525 ლარი გამოიყო, ხოლო თბილისის მერიიდან და რაიონული გამგეობებიდან 1 458 962 ლარი გადაირიცხა. აღსანიშნავია, რომ მთავრობის განკარგულების საფუძველზე სხვა ნივთებთან ერთად საპატრიარქოს საწვავის 10-ტონიანი რეზერვუარი გადაეცა.
ამას ემატება საავტომობილო საშუალებები და ათასობით ჰექტარი სასოფლო და არასასოფლო სამეურნეო დანიშნულების მიწის ნაკვეთები, რომლებსაც მთავრობა საპატრიარქოს სიმბოლურ ფასად, 1 ლარად, გადასცემს.
ოფიციალური ინფორმაციით, საქართველოს საპატრიაქროს 84 არასამეწარმეო იურიდიული პირი აქვს დაფუძნებული, მის დაქვემდებარებაშია 90-მდე საგანმანათლებლო დაწესებულება და 16 ფონდი. საჯარო რეესტრის მონაცემებით კი, საქართველოს მართლმადიდებელი ეკლესიის სრულ ან ნაწილობრივ მფლობელობაში 27 ბიზნესკომპანია ფიქსირდება.
საქართველოში არსებულ კონფესიებს შორის მართლმადიდებელი ეკლესია ყველაზე დიდია. კვლევების მიხედვით, მოსახლეობის 80% მართლმადიდებელია, თუმცა აღსანიშნავია NDI-ს ბოლო კვლევა, რომლის მიხედვითაც, საქართველოს მართლმადიდებელი ეკლესიის საქმიანობას დადებითად მხოლოდ გამოკითხულთა 55% აფასებს.
ბოლო პერიოდში საპატრიარქოს ბალანსზე ჩარიცხულ თანხებთან და მათ დაქვემდებარებაში არსებულ ბიზნესებთან დაკავშირებით გაჩენილ კითხვებზე არასამთავრობო ორგანიზაციები და ექსპერტები აქტიურად საუბრობდნენ და აცხადებდნენ, რომ მართლმადიდებელი ეკლესიის საქმიანობასთან დაკავშირებით მოსახლეობას მწირი ინფორმაცია აქვს.
რაში იხარჯება საქართველოს ბიუჯეტიდან საპატრიარქოს ბალანსზე გადარიცხული თანხა, ახდენს თუ არა ქვეყანაში რომელიმე უწყება აღნიშნული თანხის მონიტორინგს, იხდის თუ არა მართლმადიდებელი ეკლესია მიწის და მოგების გადასახადს და რას გულისხმობს კანონიკური სამართალი - თეოლოგი ლევან აბაშიძე განმარტავს, რომ კონსტიტუციის მიხედვით, სახელმწიფო იღებს ვალდებულებას, ეკლესიას კომპენსაციის სახით თანხა გადაუხადოს, თუმცა კონკრეტულად, რა თანხაზეა საუბარი, ან რისი კომპენსირება ხდება, ქვეყნის მთავარ კანონში ამაზე არაფერი წერია.
ლევან აბაშიძე აცხადებს, რომ ბიუჯეტში საქართველოს თითოეული მოქალაქის ფული შედის, მათ შორის სხვა კონფესიების წარმომადგენლებისაც, რომლებსაც, შესაძლოა სულაც არ უნდოდეთ მართლმადიდებელი ეკლესიისთვის კომპენსაციის გაწევა.
თეოლოგი მიიჩნევს, რომ საქართველოს პარლამენტი ვალდებულია კონტროლი გაუწიოს, მთავრობის მიერ საპატრიარქოს ბალანსზე გადარიცხული თანხების მიზნობრიობას და განსაზღვროს, თუ რაში ხარჯავს ეკლესია ამ თანხებს.
„საქართველოს კანონმდებლობით, საპატრიარქოს დაფინანსება ასეთი პუნქტით გადის, კონსტიტუციურ შეთახმებაში წერია, რომ საქართველო იღებს თავის თავზე ვალდებულებას, რომ კომპენსაციის სახით თანხა გადაუხადოს ეკლესიას, თუმცა იქ არ არის ზუსტად გაწერილი რა ტიპის, რისი კომპენსაცია უნდა მოახდინოს, ან რა ოდენობის თანხაზეა საუბარი, რა დროში უნდა მოხდეს გადახდა. პროცესი გამჭვირვალე არ არის. ბიუჯეტი ყველა მოქალაქის მიერ გადახდილი თანხაა, მათ შორის მათიც, ვინც შეიძლება საერთოდ არ არის მართლმადიდებელი ქრისტიანი, ან შესაძლოა არის მაგრამ არ არის იმის მომხრე, რომ მილიონები გადაუხადოს საპატრიარქოს. კანონით ჩვენ შეგვიძლია მოვთხოვოთ სახელმწიფოს, შენ მიჰყევი შენს ფულს. ნებისმიერ დემოკრატიულ ქვეყანაში ასე უნდა იყოს. როცა შენ 25 მილიონს გადასცემ, უნდა გქონდეს უფლება, რომ მიხვიდე და შეამოწმო. პარლამენტმა გამოყო ეს თანხა, პარლამენტს ემორჩილება კონტროლის პალატა და მასვე აქვს კონტროლის ფუნქციები ქვეყანაში. მათ უნდა მოვკითხოთ, იქნებ ეს ფული სხვაგან მიდის, იქნებ კორუფციულ თემებს ხმარდება“, - განაცხადა ლევან აბაშიძემ.
თეოლოგი აცხადებს, რომ საქართველოს ყველა მთავრობა სხვადასხვა ფორმით ცდილობდა ეკლესიის მოსყიდვას, რადგან მიაჩნდათ, რომ თუ კარგი მართლმადიდებლები გამოჩნდებოდნენ, ხალხის მეტ ნდობას მოიპოვებდნენ. ლევან აბაშიძის თქმით, სახელმწიფო ვალდებულია კონფესიურობასთან მიმართებაში ნეიტრალურობა გამოიჩინოს და ქვეყანა გარკვეული რელიგიის პრინციპებით არ მართოს.
„ყველა ჩვენი ხელისუფალი, დაწყებული კომუნისტების დასუსტებიდან, ცდილობდა ეკლესიისადმი რაღაც უპირატესობები გაეწია, მიეცათ ქონება, თანხები და ა. შ. ჩემი აზრით, ეს იყო ერთგვარი მოსყიდვა, რომ ეკლესია მათ მხარეს ყოფილიყო. ყველა ჩვენი პოლიტიკოსი ცდილობს, რომ კარგი მართლმადიდებელი გამოჩნდეს, თუმცა მე თუ მკითხვათ არ ამართლებს, საქმე საქმეზე რომ მიდგა, დაუჭირა მხარი ეკლესიამ სააკაშვილს, მიუხედავად ამდენი ჯიპებისა?! რადგან საქართველოში მართლმადიდებლების ამხელა პროცენტული მაჩვენებელია, ეს აქვთ ჩვენს პოლიტიკოსებს გონებაში. თუ უნდა, რომ ხალხში პოპულარული იყოს, აუცილებლად ეკლესიური უნდა იყოს. შეიძლება მე მართლმადიდებელი ვარ, მაგრამ არ მომწონს საპატრიარქო. მე პირადად მართლმადიდებელი ვარ მაგრამ მიმაჩნია, რომ ეკლესიისთვის ფულის მიცემა ეკლესიის ცდუნებაა. კონსტიტუცია ამბობს, რომ სახელმწიფო გამოყოფილია ეკლესიისგან და ნებისმიერი კონფესიის წარმომადგენელი თანაბარუფლებიანია. თანამედროვე დემოკრატიული სახელმწიფოების მთავარი პრინციპები არის ის, რომ სახელმწიფო უნდა იყოს ნეიტრალური და არ უნდა იმართებოდეს გარკვეული რელიგიის პრინციპებით. ანუ, მე, როგორც სახელმწიფო მოხელე, არ აქვს მნიშვნელობა რომელ კონფესიას ვეკუთვნი, ან არცერთს არ ვეკუთვნი, მე ჩემს გადაწყვეტილებებში ნეიტრალური უნდა ვიყო, ანუ ბრმა უნდა ვიყო კონფესიურობის მიმართ, ჩემს სახელმწიფო გადაწყვეტილებებში ამას უპირატესობა არ უნდა მივანიჭო, კვირას სად წავალ ეს ჩემი რწმენის საკითხია“, - განმარტა აბაშიძემ.
2014 წლიდან დღემდე საქართველოს მთავრობის განკარგულებით საპატრიარქოს სიმბოლურ თანხად, ერთ ლარად 132 400 კვ. მ. არასასოფლო-სამეურნეო დანიშნულების მიწის ნაკვეთი გადაეცა.
‘’სივილ პრესმა’’ 2014 წლის განმავლობაში საქართველოს მთავრობის განკარგულებით საპატრიარქოსთვის გადაცემული მიწის ნაკვეთების ადგილმდებარეობა შეისწავლა და კონკრეტული მისამართები დაათვალიერა. საქართველოს მთავრობის #2230 განკარგულების მიხედვით, საპატრიარქოს ნორიოს აღმართის 36 ნომერში 108,49 კვმ არასასოფლო-სამეურნეო დანიშნულების მიწის ნაკვეთი გადაეცა, თუმცა რამდენადაც ჩვენთვის გახდა ცნობილი, აღნიშნული ტერიტორია მართლმადიდებელი ეკლესიისთვის არ გადაუციათ.
როგორც ჩვენთან საუბრისას კუკიის წმინდა ნინოს სახელობის ტაძარის დეკანოზმა არჩილ ხაჩიძემ განაცხადა, მთავრობას ტერიტორიის გადაცემის თხოვნით მიმართეს, თუმცა პასუხი ჯერჯერობით არ მიუღიათ. დეკანოზმა ეკლესიისთვის გადაცემული ქონების მიზნობრიობაზეც ისაუბრა და განმარტა, რომ „ყველა ფართი აზრიანად არის გამოყენებული“. მისივე თქმით, საპატრიარქო არცერთ კითხვას პასუხის გარეშე არ ტოვებს და არც ინფორმაციის გასაჯაროებას ერიდება.
“ჩვენ გვაქვს განაცხადი შეტანილი, რომ რისი საშუალებაც გამოჩნდება ის ტერიტორია გადმოგვცენ. საკვირაო სკოლის გაკეთება გვინდა, თუნდაც სასულიერო პირებისთვის ერთი გასაჩერებელი ოთახის, რაც ამჟამად არ არსებობს. არაფერი ჩვენთვის არ გადმოუციათ. მიხაილოვის ტერიტორიაზე ერთი ამბავი ატეხეს, ყველა ტელევიზია და ყველა გაზეთი მივიდა. რა კეთდება იქ?! მუსიკის, ხატწერის, გალობის, გიტარის წრეებია გახსნილი. მთელი უბნის ბავშვებს იქ კრებენ და კულტურულ გარემოში ამყოფებენ. იმ ფართში ყოველდღიურად 200 ადამიანს აჭმევენ. ეს ფართი რომ არ ქონოდათ, ტაძარი ამ ყველაფერს ვერ გააკეთებდა. ტაძარში ვერ დადგამდი ქვაბებს, ვერ მოხარშავდი და 200 ადამიანს ვერ დასვამდი. მე ვიცი, რომ რაზეც კითხვა დაუსვამთ, არცერთი უპასუხოდ არ დარჩენილა. ნამდვილად ვიცი, რომ მიმართოთ ინფორმაციას უპრობლემოდ მიიღებთ, იმიტომ, რომ ამაზე ჩვენი იურისტების სპეციალური კომისია მუშაობს“, - განაცხდაა დეკანოზმა.
აღსანიშნავია, რომ თემის დამუშავების პროცესში ‘’სივილ პრესმა’’ საპატრიარქოს ოფიციალური განცხადებით მიმართა, რომ ბიუჯეტიდან ჩარიცხული თანხის ხარჯვითი დოკუმენტაცია მოეწოდებინათ, თუმცა რამდენიმე კვირის შემდეგ იურიდიული სამსახურის წარმომადგენელმა სატელეფონო საუბრისას განგვიცხადა, რომ ისინი კანონიკური სამართლით მოქმედებენ და ინფორმაციას მხოლოდ იმ შემთხვევაში მოგვაწოდებენ, თუ ამის სურვილი თავად ექნებათ.
საქართველოს სახელმწიფოსა და სამოციქულო ავტოკეფალიურ მართლმადიდებელ ეკლესიას შორის გაფორმებული კონსტიტუციური შეთანხმების საფუძველზე, ეკლესია მიწის გადასახადისგან გათავისუფლებულია. ინფორმაციის გადასმოწმებლად ‘’სივილ პრესმა’’ შემოსავლების სამსახურს მიმართა. უწყებამ ოფიციალური წერილით გვიპასუხა და განგვიცხადა, რომ აღნიშნული ინფორმაცია „საგადასახადო საიდუმლოებას“ წარმოადგენს.
ექსპერტები ვარაუდობენ, რომ სახელმწიფოს მხრიდან აღნიშნული მიწის ნაკვეთების გადაცემის მიზნობრიობა ბუნდოვანია. ლევან აბაშიძე აცხადებს, რომ საპატრიარქო ვალდებულია ისევე გადაიხადოს მიწის საფასური, როგორც ნებისმიერი სხვა მოქალაქე იხდის და მისთვის გაუგებარია, თუ რატომ არ ინტერესდება პარლამენტი აღნიშნული საკითხით.
„ჯერ კიდევ 10-15 წლის წინ ბევრს ვესაუბრებოდი სასულიერო პირებს, ვეკითხებოდი, რად უნდა ჩვენს ეკლესიას ტყეები და მდინარეები, ეს ხომ ცუდია ჩვენთვისთქო. არგუმენტი არის ასეთი, ამ 70 წლის განმავლობაში ჩვენ ისე გვდევნეს, ისე დაგვასუსტეს, გვჭირდება, რომ გავძლიერდეთო. საკითხავი ის არის, გააძლიერებს ეს ეკლესიას თუ პირიქით, დაანგრევს. მე რომ მქონდეს არასასოფლო-სამეურნეო დანიშნულების მიწის ნაკვეთი, უშველებელი წლიური გადასახადი უნდა გადავიხადო. იხდის ამას ეკლესია? თუ კანონმდებლობით ყველამ უნდა გადაიხადოს და საქართველოს მართლმადიდებელი ეკლესია არ იხდის, ეს უკვე სხვა მომენტია, რატომ არ იხდის? არასასოფლოა, ზედ არ არის შენობები, მაშინ კეთილი ინებე და გადაიხადე, გინდა რომ გქონდეს? მაშინ გადაიხადე ქონების გადასახადი. რატომ გადასცემენ ეს კიდევ სხვა თემაა, ვინ იღებს გადაწყვეტილებებს, პარლამენტი რატომ არის ჩუმად. პარლამენტს ხომ აქვს არა მარტო კანონმდებლობის, არამედ კონტროლის ფუნქციაც, თუ მაგალითად მთავრობამ გადასცა, დასვას პარლამენტმა საკითხი, რატომ გადაეცით, რის საფუძველზე, სამწუხაროდ, ყველას უნდა, რომ ეკლესიის მხარეს იყოს. ჰგონიათ, რომ თუ ამ საკითხს დააყენებენ, ეკლესიის მტრები გამოჩნდებიან“, - განაცხადა აბაშიძემ.
პარლამენტის მხრიდან აღნიშნული საკითხით დაინტერსებასთან დაკავშირებით ‘’სივილ პრესი’’ საკანონმდებლო ორგანოს საფინანსო-საბიუჯეტო კომიტეტის წევრებს ესაუბრა. საპატრიარქოს ბალანსზე ჩარიცხულ თანხებთან დაკავშირებით მათი პოზიციები განსხვავებული აღმოჩნდა.
პეტრე ცისკარიშვილმა განაცხადა, რომ არასოდეს უფიქრია, თუ ვინ შეიძლება მოახდინოს ამ თანხების კონტროლი და განმარტა, რომ ამ საკითხზე დებატებიც კი არ გამართულა. „ნაციონალური მოძრაობის“ წევრმა პოლიტიკოსებს, მოსახლეობას და ჟურნალისტებს თემით დაინტერესებისკენ მოუწოდა და აღნიშნა, რომ საპატრიარქო ხარჯების გასაჯაროების ინიციატორი თვითონ უნდა იყოს. ამასთანავე, დეპუტატი იმედს გამოთქვამს, რომ მართლმადიდებელ ეკლესიას დასამალი არაფერი აქვს.
„ვინ უნდა მოახდინოს ამის კონტროლი, რომ არ მოგატყუოთ ჯერ არ მიფიქრია და მართალს ბრძანებთ, როგორც ასეთი, ეს არც გაკონტროლებულა. როგორც საფინანსო-საბიუჯეტო კომიტეტის წევრს ნამდვილად არ შემიმოწმებია მათი ხარჯვა და რაში გაიხარჯა ეს თანხები, ნამდვილად არ ვარ კომპეტენტური. რომ გითხრათ, ამის თაობაზე რაიმე აუდიტორული დასკვნები არსებობს, ან რომელიმე კომიტეტი ამას სწავლობს, ასე ნამდვილად არ არის. მე დარწმუნებული ვარ, რომ ამასთან დაკავშირებით თუ სამოქალაქო სექტორიდან, პოლიტიკური და ჟურნალისტური წრეებიდან დაინტერესება გამოჩნდება, ლეგიტიმური იქნება. საპატრიარქოს მხრიდან უნდა გადაიდგას ნაბიჯი, თვითონ უნდა გამოიჩინონ ინიციატივა, რომ ეს ხარჯვა გამჭვირვალე იყოს“, - განაცხადა პეტრე ცისკარიშვილმა.
პარლამენტის საფინანსო-საბიუჯეტო კომიტეტის თავმჯდომარის მოადგილე კი აცხადებს, რომ საპატრიარქოსთვის თანხის ჩარიცხვა სუბსიდირების სახით ხდება, რის გამოც კონტროლის პალატას მისი შემოწმება არ ევალება. ნოდარ ებანოიძის თქმით, მართლმადიდებელი ეკლესია თანხების ხარჯვითი ნაწილის გასაჯაროებას არ ერიდება, თუმცა მას შემდეგ, რაც დეპუტატს ავუხსენით, რომ საპატრიარქომ აღნიშნული დოკუმენტაცია არ მოგვაწოდა, კანონმდებელმა განაცხადა, რომ მართლმადიდებელი ეკლესია საჯარო დაწესებულება არ არის და შესაბამისად, ამის გაკეთების ვალდებულებაც არ აქვს.
ნოდარ ებანოიძემ ახლადშექმნილ რელიგიის საქმეთა სახელწმიფო სააგენტოზეც ისაუბრა და განმარტა, რომ ადგილობრივი თვითმმართველობებიდან საპატრიარქოს ბალანსზე გადარიცხულ თანხებს სწორედ ეს სააგენტო აკონტროლებს.
„ახლა რელიგიის საქმეთა სააგენტოც შეიქმნა და ისინი, განსაკუთრებით ადგილობრივი თვითმმართველობებიდან დაფინანსებების ასე ვთქვათ მონიტორინგს აკეთებენ და შესაბამისად, ეს რაღაც ჩარჩოებში ექცევა. ეს თემა საერთოდ მიშვებული იყო, იმიტომ, რომ თვითმმართველობების ნაწილი დაფინანსებას ისე აკეთებდა, მემგონი ძალიან ხშირად საპატრიარქომაც არ იცოდა დაფინანსებები რომ ხდებოდა“, - განაცხადა დეპუტატმა.
‘’სივილ პრესი’’ რელიგიის საქმეთა სახელმწიფო სააგენტოსაც დაუკავშირდა, თუმცა როგორც პრესსამსახურმა ჩვენთან საუბარში განმარტა, სააგენტოს არანაირი მონიტორინგის ფუნქცია არ გააჩნია.
“ჩვენ მონიტორინგის ფუნქცია არ გვაქვს, ზოგადად მონიტორები არ ვართ, მით უფრო თუ საკითხი მუნიციპალიტეტების ფინანსურ მოძრაობებს ეხება. ჩვენ მხოლოდ რელიგიური დანიშნულების მიმართულებებს ვიხილავთ, ისიც სახელმწიფოსა და რელიგიურ ორგანიზაციებს შორის“, - განაცხადა რელიგიის საკითხთა სახელმწიფო კომისიის საზოგადოებასთან ურთიერთობის სამსახურმა.
სამოქალაქო სექტორისთვის და არასამთავრობო ორგანიზაციებისთვის ბუნდოვანია, იხდიან თუ არა საპატრიარქო და მასში შემავალი ბიზნესკომპანიები საშემოსავლო გადასახადებს. ფინანსთა სამინისტროსგან გამოთხოვილი ინფორმაციის თანახმად, საქართველოს საპატრიარქოს თანამონაწილე ფიზიკური პირები, რომლებიც ეკონომიკურ საქმიანობას ახორციელებენ, აღნიშნული საქმიანობის ფარგლებში საშემოსავლო გადასახადით იბეგრებიან, თუმცა უწყების მიერ მოწოდებულ განცხადებაში, საკმაოდ ბუნდოვნად არის საუბარი საპატრიარქოს მოგების გადასახადის დაკავებასთან დაკავშირებით.
საპატრიარქო სრულად ან ნაწილობრივ 27 ბიზნესკომპანიას ფლობს. მართლმადიდებელი ეკლესიის ერთ-ერთი ყველაზე ცნობილი ბიზნესი მინერალური წყალი „სნოა“, სადაც საპატრიარქო 20 %-იანი წილის მფლობელია.
2014 წლის ზაფხულში, ანაკლიაში კაზანტიპის ფესტივალი არც თუ ისე წარმატებულად გაიმართა. ტურიზმის დეპარტამენტის ყოფილი ხელმძღვანელი გიორგი სიგუა აცხადებდა, რომ ფესტივალის ფინანსური წარუმატებლობა ეკლესიისგან წამოსულმა წინააღმდეგობებმა განაპირობა. სიგუა განმარტავდა, რომ ეკონომიკის მინისტრთან ერთად საპატრიარქოში დაიბარეს და ფესტივალის გაუქმება მოსთხოვეს. საპატრიარქოს მორიგი ნაბიჯი კი, როგორც ტურიზმის დეპარტამენტის ყოფილი თავმჯდომარე აცხადებდა, „სნოს“ უკავშირდებოდა. სიგუა ამბობდა, რომ ეკლესია კაზანტიპის ფესტივალზე "სნოს" შეტანას ექსკლუზიურად ითხოვდა.
„სნოს“ სურდა, რომ ისინი წყლის ექსკლუზიური გამყიდველები ყოფილიყვნენ, რაც საკმაოდ ძვირადღირებული ლოტი იყო, „სნო“ ამას აბსოლუტურად უფასოდ იღებდა, ეს იყო მათი მოთხოვნა, რომ წყალი მათ უნდა გაეყიდათ. შევთანხმდით, ეკლესია ითხოვდა "სნოს" შემოტანას. თვითონ სასულიერო პირები ითხოვდნენ, ჩვენ უნდა შემოვიტანოთ, თავად კომპანია კი არ მოსულა. ეს გაიტანეს, მაგრამ შემდეგ სხვა რაღაცებიც მოითხოვეს და წარმოიშვა ნიკიტა მარშუნოკსა და მათ შორის ბიზნესდაპირისპირება, თქვენ რა გგონიათ, სასულიერო პირები არიან ჩვეულებრივი ბიზნესმენები, ფირმები აქვთ, ბიზნესს აწარმოებენ, გადასახადებს არ იხდიან“, - აცხადებდა სიგუა.
‘’სივილ პრესი’’ გიორგი სიგუას და ნიკიტა მარშუნოკს დაუკავშირდა, თუმცა ტურიზმის დეპარტამენტის ყოფილმა თავმჯდომარემ თავისივე გაკეთებული განცხადებები უარყო და განმარტა, რომ მოლაპარაკებების მიმდინარეობის პროცესში საპატრიარქო არ ჩარეულა.
“არავითარი შეხება და შეფერხება მე არ მქონია. იყო რაღაც დონეზე მისკომუნიკაცია და მადლობა ღმერთს ყველაფერი გაირკვა. მე მასეთი რამ არსად მითქვამს, რომ საპატრიარქო იყო ამ ამბავში გარეული. გარკვეული პროვოკატორები ცდილობდნენ ამ თემაში ცუდად ჩართულიყვნენ და წარმოეჩინათ ეს ინსტიტუტი, რომელთანაც მისკომუნიკაციის მეტი პრობლემა ისიც გარკვეულ ეტაპზე, არ ყოფილა”, - განაცხადა გიორგი სიგუამ.
ნიკიტა მარშუნოკმა კი განაცხადა, რომ საქართველოში ხელისუფლებაზე მეტი გავლენა ეკლესიას აქვს. „კაზანტიპის“ ფესტივალის პრეზიდენტის თქმით, საპატრიარქოს წარმომადგენლები აქციების შეწყვეტის სანაცვლოდ მას 100 000 $ სთხოვდნენ.
„შემიძლია ბევრი რამ გითხრათ თქვენი საპატრიარქოს შესახებ, მაგრამ გეწყინებათ. იმის მოთხოვნა, რომ ექსკლუზიურად ფესტივალზე მხოლოდ „წმინდა წყალი“ სნო გაიყიდოს, დამერწმუნეთ, ეს ყველაზე მცირე და უწყინარი რამაა მართლმადიდებლური ეკლესიის მხრიდან განხორციელებული რეკეტის ისტორიაში კაზანტიპის ფესტივალის მიმართ. თქვენთვის საიდუმლო არაა, რომ ეკლესიას თქვენს ქვეყანაში გაცილებით დიდი ძალაუფლება აქვს, ვიდრე ხელისუფლებას. ისინი შეგნებულად ქმნიდნენ პრობლემებს და გვთავაზობდნენ ყველა საკითხი შემოწირულობების გაღების შემდეგ მოგვეგვარებინა. დემონსტრაციების შემდეგ, ყოველ ჯერზე მოდიოდნენ ეს ადამიანები და გვთხოვდნენ შემოწირულობა გაგვეღო ეკლესიისთვის, თუნდაც 100 000 $ ფარგლებში, რათა პრობლემები მოგვარებულიყო. სრულიად არანორმალურად მიმაჩნია, როდესაც ფინანსთა მინისტრი და სხვა მაღალჩინოსნები ყველა საკითხში რჩევისთვის საპატრიარქოს მიმართავენ. თქვენ არ გყავთ მთავრობა, თქვენ გასული საუკუნის წვერიანი კაცები და არაკომპეტენტური ადამიანების ჯგუფი გმართავთ“, - განაცხადა ნიკიტა მარშუნოკმა.
აღსანიშნავია ისიც, რომ საქართველოში მოქმედი თითქმის ყველა სახელმწიფო უწყება მინერალური წყლის „სნოს“ მომსახურებით სარგებლობს. ჩვენ მიერ გამოთხოვილი ინფორმაციის საფუძველზე, ირკვევა, რომ 2014 -2015 წლებში სხვადასხვა სამინისტროების მიერ „სნოს“ შესყიდვისთვის 115 067.64 ლარი დაიხარჯა.
„ბიზნესებს თუ ეკლესიური სამართლით მართავენ, ეს აბსურდია“, - ლევან აბაშიძის განცხადებით, კანონიკური სამართალი ეკლესიის გარეთ არაფერს არეგულირებს და თუ ეკლესია საერო საქმიანობაში ერთვება, ის კანონები უნდა დაიცვას, რაც ქვეყანაშია.
„90-იან წლებში, საპატრიარქოს შეეძლო ბაჟის გარეშე შემოეტანა საქონელი და გაეყიდა. ცხადია, მთელი კორუფციული სქემები ეკლესიიდან ხდებოდა. აქ საუბარი იმაზე კი არ არის, რომ ეკლესიაა კორუმპირებული, მე რომ ვარ კორუმპირებული, მივალ ეკლესიაში და დავიწყებ იქ რაღაც საქმეების კეთებას. შესაძლოა ირიბი უპირატესობები აქვს საპატრიარქოს. ეკლესია საერთოდ არ სჯის იმას, რაც თავის გარეთ არის. ასე, რომ თუ შიდა ბიზნესი აქვს და შიგნით აკეთებს რამეს, კი ბატონო მაგრამ თუ „სნოზეა“ საუბარი, აქ უკვე შიდა ბიზნესი არაფერ შუაშია“, - განაცხადა აბაშიძემ.
თეოლოგმა ყურადღება კანონიკური სამართლის ასპექტებზე გაამახვილა და განმარტა, რომ ეკლესია ვალდებულია დააზუსტოს, რომელი კანონებით მართავს ბიზნესს და რომელი სამართლით მოქმედებს.
„ჩვენ რასაც ვეძახით საეკლესიო ტრადიციულ კანონებს იმდენად შორს არის ჩვენგან, რომ შეუძლებელია მისი აღსრულება. მაგალითად, კანონიკურ სამართალში წერია, რომ მართლმადიდებელი მღვდელი არ უნდა წავიდეს ებრაელ ექიმთან. წერია, რომ მღვდელს არ აქვს უფლება, საროსკიპო ჰქონდეს გახსნილი, რუის ურბნისის კრებაში წერია, რომ არავის არ აქვს უფლება, ხატი გამოიტანოს, გადაადნოს და გაყიდოს. ამიტომ, ჩვენ რომ ვნახოთ კანონიკურ სამართალში რა წერია სახელმწიფოს მიერ გამოყოფილი ფულის ხარჯვასთან დაკავშირებით, აბსურდია. ეკლესიამ უნდა დააზუსტოს, რომელ კანონიკურ სამართალს გულისხმობს, ანუ რა კანონებით მართავს მაგალითად ბიზნესს, რომელი სამართლით მოქმედებენ, რა სამართალს გულისხმობენ, ჩემი აზრით, თუკი ეკლესია საერო საქმინაობაში ერთვება, ბიზნესი ხომ საეროა, მაშინ მან ის კანონები უნდა დაიცვას, რომელიც ქვეყანაშია“, - განაცხადა ლევან აბაშიძემ.
‘’სივილ პრესმა" არა ერთხელ სცადა საპატრიარქოს პრესმდივანს დაკავშირებოდა, თუმცა მიქაელ ბოტკოველი ჩვენთან სატელეფონო საუბარში, კომენტარის გაკეთებისგან თავს იკავებდა. საბოლოოდ, მისი ჩაწერა ღვთისმშობლის ტაძრად მიყვანების ეკლესიაში მოხერხდა. საპატრიარქოს პრესმდივანმა არასამთავრობოების კვლევების მიზნობრიობაზე უკმაყოფილება გამოთქვა და განმარტა, რომ საქართველოს მართლმადიდებელ ეკლესიას საბჭოთა რეჟიმისგან განუსაზღვრელი ოდენობის ზიანი მიადგა, რის გამოც სახელწმიფომ კონსტიტუციით აიღო ვალდებულება, რომ ეკლესიის ყველა ის მოთხოვნა დააკმაყოფილოს, რაც მისთვის აუცილებელია.
„საქართველოს მართლმადიდებელ ეკლესიას განსაკუთრებული როლი მიუძღვის საქართველოს აღმშენებლობის და სახელმწიფოებრიობის ჩამოყალიბების პროცესში, ამიტომაც მას კონსტიტუციით განესაზღვრა, რომ განსაკუთრებული ადგილი უკავია ჩვენი ერის ცხოვრებაში. ის, რომ სახელმწიფო მას პერიოდულად ქონებას გადასცემს, ესეც კონსტიტუციით არის განსაზღვრული. ეს სახელმწიფო იმ სახელმწიფოს მემკვიდრეა, რომელმაც თავის დროზე ეკლესიას განუსაზღვრელი ოდენობის ზიანი მიაყენა. ამიტომ ეკლესია პერიოდულად სახელმწიფოსგან კომპენსაციის სახით იღებს დახმარებას და ეს აბსოლუტურად გასაგებია. ჩვენ ვაგვარებთ სახელმწიფოსთან ამ ურთიერთობებს, სახელმწიფოსაც ესმის, რომ ეკლესიას დახმარება სჭირდება, რომ საზოგადოებაში კუთვნილი ადგილი დაიბრუნოს. ის გვეხმარება ჩვენ საგანმანათლებლო დაწესებულებების დაფინანსებაში, ეკლესიის მშენებლობისათვის მიწის გადმოცემის საკითხებში და გარკვეული ქონების, რომელიც ეკლესიას ამა თუ იმ აუცილებლობისთვის სჭირდება. არასამთავრობო ორგანიზაციების გარკვეული ნაწილი ეკლესიის მიმართ უარყოფითად არის განწყობილი და ეს მათი პრობლემაა, მათ შეუძლიათ დაწერონ, გააშუქონ ეს თემები, ჩვენ კი, რა თქმა უნდა, მიზანმიმართულად გავაგრძელებთ საქართველოს ხელისუფლებასთან კონსტრუქციულ რეჟიმში თანამშრომლობას იმისათვის, რომ ეკლესიამ ის ყველაფერი მიიღოს, რაც მისთვის საჭიროა“, - განაცხადა საპატრიაქროს პრესმდივანმა.
რა უჯდება სახელმწიფოს ეკლესიის ''შენახვა'' <3
