http://www.cp.ge/ge/statiacci.php?ID=45220"რისკები ბუნებრივია არის, რადგან საქმე გვაქვს "გაზპრომთან". "გაზპრომი" გახლავთ რუსული იმპერიალიზმის ან ნეოიმპერიალიზმის, თუ გნებავთ ენერგეტიკული იმპერიალიზმის ერთ-ერთი მთავარი განსახიერება და თუ ამ მიმართულებით სიახლეებია, ეს პროცესი უნდა იყოს პოლიტიკური წრეებისა და საზოგადოებისთვის მაქსიმალურად გამჭვირვალე. ყველაფერი უნდა იყოს ცხადი, რადგან ჩვენ გვაქვს მწარე გამოცდილება რუსეთში ღვინის ექსპორტის მნიშვნელოვანი ზრდისა და შემდეგ მნიშვნელოვანი დაცემისა, რისი მომსწრენიც წელს გავხდით. აქ პოლიტიკურ რისკებზეც უნდა ვილაპარაკოთ, რომელიც ნამდვილად თან სდევს ხოლმე კომპანია "გაზპრომის" საქმიანობას საერთაშორისო ასპარეზზე. საქართველოს ჰყავს საიმედო პარტნიორები: აზერბაიჯანი, თურქმენეთი. ასევე სერიოზულია დაინტერესება ყაზახეთის მხრიდან ანუ იმ დროს, როცა მსოფლიო ცდილობს შეამციროს თავისი ენერგოდამოკიდებულება რუსეთზე, ამ ქვეყნიდან გაზის თუ ნებისმიერი ენერგომატარებლის მოცულობის ზრდა საქართველოს მიმართულებით კონტექსტიდან ამოვარდნილად გამოიყურება. შესაძლოა საგანგაშო არც არაფერი ხდებოდეს, მაგრამ ერთი შეხვედრა უკვე გაიმართა, რუსულმა მხარემ დაანონსა, რომ გაიმართება მეორე შეხვედრაც ანუ რაღაც პროცესი დაიწყო. უნდა გაირკვეს, რა მიმართულებით მიდის ეს პროცესი და ხომ არ აღმოჩნდება ჩვენი დამოკიდებულება რუსეთზე მზარდი - ის რისგანაც ჩვენ, მადლობა ღმერთს, თავი დავიხსენით უკანასკნელ წლებში", - განაცხადა ივლიანე ხაინდრავამ.
ხაინდრავა “გაზპრომთან“ დაკავშირებით პრემიერის მიერ გაკეთებულ განცხადებასაც გამოეხმაურა და განმარტა, რომ საკითხთან დაკავშირებით მთავრობის წარმომადგენლები ურთიერთგამომრიცხავ შეფასებებს აკეთებენ.
"ალბათ სჯობს, პრემიერმა პირველ ყოვლისა, თავის გარემოცვას მისცეს შენიშვნები, რომელიც ურთიერთსაწინააღმდეგო, ხანდახან გამომრიცხავ მესიჯებს აჟღერებს. გვაქვს ვითარება, როცა პრემიერი ამბობს, რომ არ იცის, რაზე საუბრობს ენერგეტიკის მინისტრი "გაზპრომის" ხელმძღვანელთან ბრიუსელში, ხოლო შემდეგ ენერგეტიკის მინისტრი აცხადებს, რომ მისთვის უცნობია, რის თაობაზე საუბრობს სასწრაფოდ ბაქოში გაფრენილი პრემიერ-მინისტრი. ეს ბუნებრივია, იწვევს ლეგიტიმურ კითხვებს", - განმარტა ხაინდრავამ.
გაზპრომი რუსული იმპერიალიზმის განსახიერებაა, ხაინდრავა
