http://www.liberali.ge/ge/liberali/news/127585/დიდი ბრიტანეთის ელჩი: საქართველომ „პატარა გამოცდა“ ვერ ჩააბარა
დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩი საქართველოში ალექსანდრა ჰოლ ჰოლი საქართველოს დღევანდელი მდგომარეობის შესახებ საუბრობს.
ელჩმა თბილისში მაკკეინის ინსტიტუტის საერთაშორისო ლიდერობისთვის და ეკონომიკური პოლიტიკის კვლევის ცენტრის (EPRC) ორგანიზებულ საერთაშორისო კონფერენციაზე („ევროპის ახალი გეოპოლიტიკური ლანდშაფტი: უსაფრთხოება, ეკონომიკური შესაძლებლობები, თავისუფლება და ადამიანური ღირსება ფრონტისპირა ქვეყნებში") საქართველოში არსებული პოლიტიკური ვითარება აღწერა.
ალექსანდრა ჰოლ ჰოლის განცხადებით, საქართველო რეგიონში ლიდერობს და ამით უნდა იამაყოს კიდეც, თუმცა თუკი იმ თვალსაზრისით დავაკვირდებით მდგომარეობას, თუ განვითარების რა ეტაპზე სურს საქართველოს ყოფნა, არსებობს გამოწვევები, კერძოდ კი პერსონალიზებული პოლიტიკა.
მისი თქმით, როგორც ამჟამინდელ და ისე წინამორბედ პრეზიდენტსა და პრემიერზე პერსონალური თავდასხმა ხდება, რაც არა უშუალოდ ამ ადამიანების, არამედ ამ ინსტიტუტების დაკნინებას ნიშნავს.
ელჩი ამბობს, რომ გასულ წელს უამრავი ინციდენტის მოწმე გახდა, რომელშიც ერთმანეთს პოლიტიკოსები უპირისპირდებოდნენ, მათ შორის ოპოზიციის ლიდერებს ნახევრად გამოჩეკილი წიწილები ესროლეს.
„ჩემი აზრით, არსებობს განწყობა, რომ თუ გაუვათ, ამას გააკეთებენ. მაგრამ, თუ რაღაცის გაკეთება შეიძლება, ეს არ ნიშნავს, რომ ეს აუცილებლად უნდა გააკეთო", - აცხადებს დიპლომატი და აღნიშნავს, - "ბრიტანეთში ასეთი გამოთქმა გვაქვს: „პატარა გამოცდის“ ჩაბარებას ვეძახით. საქართველოში განვითარებული მოვლენების გათვალისწინებით, მან ეს „პატარა გამოცდა“ ვერ ჩააბარა. მაგალითად, ის თუ, როგორ იყენებენ წინასწარ პატიმრობას“.
ელჩი მოქალაქეების ქმედებებსაც აღწერს: „საქართველოში ჩამოსული უცხოელები ყოველთვის იმაზე ლაპარაკობენ თუ როგორ ატარებენ საქართველოში მძღოლები ავტომანქანას და როგორ ანაგვიანებენ გარემოს“.
რაც შეეხება დადებით ტენდენციებს, ჰოლ ჰოლი ამბობს, რომ საქართველოში ყოფნის განმავლობაში სამ არჩევნებს მოესწრო.
„ყოველი მომდევნო არჩევნები წინაზე უკეთესი იყო. საქართველო სწორი მიმართულებით ვითარდება და ამას Freedom House-ის რეიტინგებიც მოწმობს“, - თქვა ბრიტანეთის ელჩმა.
მისი თქმით, მოქალაქეებს აქვთ საშუალება, მთავრობა თავისუფალი და დამოუკიდებელი არჩევნების გზით აირჩიონ, აქვთ წვდომა ინფორმაციაზე, რომ გაცნობიერებული არჩევანი გააკეთონ, ამასთან, პოლიტიკურ ძალებს, მედიასა და სამოქალაქო საზოგადოებას მთავრობის გაკრიტიკებისა და მისი გამოწვევების საშუალება ეძლევა, თუმცა მდგომარეობა იდეალური არ არის.
-------------
აბა ჰე, წავიდა ბრიტანეთის გინება
საქართველომ „პატარა გამოცდა“ ვერ ჩააბარა, - დიდი ბრიტანეთის ელჩი
