არსებობს სტერეოტიპი, რომ მოძრაობის წესებს ყველაზე ხშირად და უხეშად BMW-ს მარკის მანქანის მძღოლები არღვევენ, დადიან სწრაფად და გარშემომყოფებს საფრთხეში აგდებენ.
თუმცა, ორგანიზაცია JumpStart Georgia-ს ახალი ინფოგრაფიკით ირკვევა, რომ ადგილობრივ გზებზე სიჩქარის გადაჭარბების გამო მიღებული ჯარიმებით პროცენტულად პორშე ლიდერობს. ინფორმაცია ამის შესახებ შსს-დან გამოითხოვეს.
გინახავთ პორშე თბილისში? მე არა. ყოველ შემთხვევაში, ყოველდღე ნამდვილად ვერ ვხედავ. ალბათ იმიტომ, რომ ძალიან ცოტაა. ალბათ, მაქსიმუმ 10. აქედან ხუთს გაზზე ჰყავს გადაყვანილი, ორს - მამამისი არ უშვებს თუ კარგად არ მოიქცევიან და დანარჩენი სამი - დაჰქრის აქეთ-იქით.
მაგრამ რეალობა უფრო გასაკვირია. საქართველოში 675 პორშე ყოფილა რეგისტრირებული. 675, კარლ! და ამ 675 მანქანიდან 83%-ს აქვს მიღებული ჯარიმა სიჩქარის გადაჭარბებისთვის, ანუ 675 მანქანიდან სიჩქარეს 530 აჭარბებს.
ამ მაჩვენებლით მეორე ადგილზე გავიდა ლექსუსი. 5 385 რეგისტრირებული მანქანიდან 66% (ანუ 3554) ამეტებს სიჩქარის ლიმიტს.
მესამეზე გავიდა BMW. არა! მესამეზე გავიდა ლენდ როვერი. ამ შემთხვევაში გადაჭარბების 48%-იანი მაჩვენებელი გვაქვს.
მოკლედ, ბევრი რომ აღარ გავაგრძელო, BMW გავიდა მეათე ადგილზე. საქართველოში რეგისტრირებული BMW-ების მხოლოდ 33% აჭარბებს სიჩქარეს - ანუ, 56 723 მანქანიდან "მხოლოდ" 18 718 იქცევა უმსგავსოდ! რაოდენობრივად ბევრია, მაგრამ პირველი ადგილისთვის - არასაკმარისი.
სტატისტიკური მონაცემების მიხედვით, BMW-ზე სწრაფად კიას, ტოიოტას, მინი-კუპერის, ინფინიტისა და ჰიუნდაის მძღოლები დადიან.
რაოდენობრივად კი, ყველაზე ცუდი მძღოლები მერსედესს მართავენ. 146 380 რეგისტრირებული ავტომობილიდან, 48 305 იღებს ჯარიმას გადაჭარბებული სიჩქარის გამო.
ზღარო 
თურმე, საქართველოში სიჩქარის გადაჭარბებაში, სულაც არ ლიდერობს BMW
