გაერთიანებული წყალმომარაგების კომპანიის ყოფილი მთავარი ბუღალტერი ყოფილ ხელმძღვანელსა და ზვიად ჯანყარაშვილს ადანაშაულებს
14:56 02-11-2015
გაერთიანებული წყალმომარაგების კომპანიის ყოფილი მთავარი ბუღალტერი ყოფილ ხელმძღვანელსა და ზვიად ჯანყარაშვილს ადანაშაულებს გაერთიანებული წყალმომარაგების კომპანიის ყოფილი მთავარი ბუღალტერი, ბრალდებული თამარ ფხოველიშვილი აცხადებს, რომ დანაშაულებრივ სქემაში, რომელსაც კომპანიის მაშინდელი ხელმძღვანელი არჩილ ცაბუტაშვილი კურირებდა, მას მწვანე შუქი ზვიად ჯანყარაშვილისგან ჰქონდა.
ამის შესახებ თამარ ფხოველიშვილმა საქალაქო სასამართლოში, ბრალდებულის სახით დაკითხვისას განაცხადა და აღნიშნა, რომ ცაბუტაშვილმა დაკითხვისას რამდენიმე ყოფილი მაღალჩინოსნის გვარიც ახსენა, კერძოდ, მან აღნიშნა, რომ ცაბუტაშვილი ყოფილი მინისტრების, ელგუჯა ხოკრიშვილისა და დავით შავლიაშვილის ახლო მეგობარია. მისი თქმით, გარემოს დაცვის სამინისტროსა და წყალმომარაგების კომპანიას შორის კადრები სწორედ მათთან შეთანხმებით იცვლებოდა.
რაც შეეხება უშუალოდ დანაშაულის თემას, როგორც თამარ ფხოველიშვილმა დაკითხვისას აღნიშნა, წყალმომარაგების კომპანიის ფინანსურმა დირექტორმა, კახა სოლოღაშვილმა მოამზადა სქემა, რომლის მიხედვითაც, გარკვეული თანხები იმ ანგარიშზე უნდა გადარიცხულიყო, რომელიც კომპანიას აღარ ეკუთვნოდა. როგორც ფხოველიშვილმა თქვა, ცაბუტაშვილმა მას უთხრა, რომ გადარიცხული თანხების 20% მისი იქნებოდა, 80% კი მას ცაბუტაშვილთან უნდა მიეტანა.
თამარ ფხოველიშვილის მტკიცებით, კომპანიიდან მითვისებული 3 მილიონამდე ლარიდან 1 700 000 ლარი დახარჯული აქვს არჩილ ცაბუტაშვილს. მიცემულ ჩვენებაში ფხოველშვილმა თავი წარდგენილ ბრალდებაში ნაწილობრივ ცნო დამნაშავედ, კერძოდ მან აღნიშნა, ჯგუფური დანაშაული არა იმ პირებთან ერთად ჩაიდინა, რომლებიც ამ საქმეზე ბრალდებულები არიან, არამედ ცაბუტაშვილთან და სოლოღაშვილთან, რომლებმაც უშუალოდ სქემაში მონაწილეობა შესთავაზეს.
დანაშაულის ჩადენის მოტივად კი ფხოველიშვილი ასახელებს იმ გარემოებას, რომ მის შვილს ჯანმრთელობის პრობლემა ჰქონდა და თანხა სჭირდებოდა. რაც შეეხება ხოკრიშვილისა და შავლიაშვილის გვარების დასახელებას, თამარ ფხოველიშვილმა განმარტა, რომ ისინი ცაბუტაშვილის ახლო მეგობრები იყვნენ და წყალმომარაგების კომპანიიდან არჩილ ცაბუტაშვილი სქემის განხორციელების შემდეგ, სწორედ გარემოს დაცვის მინისტრის მოადგილედ დაინიშნა. ასევე, ბრალდებულის თქმით, ისიც მას შემდეგ რაც 2014 წლის ბუღალტრულ ანგარიშს ჩაამთავრებდა, გარემოს დაცვის სამინისტროში ცაბუტაშვილის შეთავაზებით უნდა გადასულიყო.
"მე და ცბუტაშვილი 30 წელია, ვმეგობრობთ და ვიცი, რომ ჯანყარაშვილი მისი მეგობარი, ბავშვის ნათლია და მეჯვარეა. ცაბუტაშვილმა როდესაც სქემაზე მესაუბრებოდა, მითხრა, რომ მწვანე შუქი გვაქვს ანთებული და ვერავინ ვერაფერს გვეტყვის, ვერც შეგვამოწმებენო",-აღნიშნა ბრალდებულმა.
სასამართლო ამ წუთებში კითხავს თამარ ფხოველიშვილის მეუღლეს, ზურაბ ნუცუბიძეს, რომელიც დანაშაულთან კავშირს უარყოფს", - განაცხადა თამარ ფხოველიშვილმა.