ბესიკ ხარძიანის მკვლელობის საქმე გახსნილია. ამის შესახებ მთავარ პროკურატურაში გამართულ საგანგებო ბრიფინგზე გახდა ცნობილი.
ხარძიანის მკვლელობაში მხილებული არიან უკრაინის მოქალაქე, 31 წლის ოლეკსანდრ დამეტოვი და რუსეთის ფედერაციის მოქალაქე, 43 წლის ოლეგ დოევი.
გამოძიების ინფორმააციით, მკვლელობიდან რამოდენიმე საათში, მათ სარფის სასაზღვრო-გამშვები პუნქტის გავლით, ფეხით გადაკვეთეს საქართველოს სახელმწიფო საზღვარი.
როგორც ცნობილია, ოლეკსანდრ დამეტოვმა საქართველოს სახელმწიფო საზღვარი გადმოკვეთა ყალბი პასპორტის გამოყენებით და მკვლელობის ჩადენის შემდეგ იმავე დოკუმენტის გამოყენებით დატოვა ქვეყნის ფარგლები.
როგორც პროკურატურაში დღეს გამართულ ბრიფინგზე განაცხადეს, მიუხედავად იმისა, რომ მკვლელობის ჩადენიდან რამოდენიმე დღეში, გამოძიებისათვის უკვე ცნობილი იყო დამნაშავე პირთა ვინაობა, იმის გამო, რომ გამოძიებას ხელი არ შეშლოდა, პროკურატურის მიერ ამ დრომდე არ გასაჯაროვდა საქმის დეტალები.
პროკურატურის ინფორმაციით, ბესიკ ხარძიანის მკვლელობაში მონაწილე სხვა პირთა მხილების მიზნით გრძელდება ინტენსიური გამოძიება, ხოლო ძებნილ პირთა ადგილსამყოფელის დადგენისა და დაკავების მიზნით, ტარდება შესაბამისი ოპერატიულ-სამძებრო ღონისძიებები.
ბესო ხარძიანი 28 მარტს მოკლეს. ბიზნესმენს საკუთარ სახლთან სამჯერ ესროლეს, დაჭრილი საავადმყოფოში გადაჰყავდათ, თუმცა მისი დახმარება ექიმებმა ვეღარ შეძლეს.
სამართალდამცველების ინფორმაციით, მკვლელი მოპედით გადაადგილდებოდა. მოპედს გამომძიებლებმა კეკელიძის ქუჩაზე მიაკვლიეს.
მოკლული ბიზნესმენის ოჯახის წევრები ამბობდნენ, რომ მკვლელობა შეკვეთილი იყო. ხარძიანების აზრით, ბიზნესმენი გია უდესიანის შეკვეთით მოკლეს. გია უდესიანის ოჯახის წევრები კი უდანაშაულობის პრეზუმციაზე მიუთითებდნენ და აცხადებდნენ, რომ თუ მათი ძმის მიმართ ცილისმწამებლური განცხადებების გაკეთება გაგრძელდება, ისინი სასამართლოს მიმართავენ. გია უდესიანი - ტყვიის სროლის ფედერაციის ყოფილი პრეზიდენტი, თბილისის სპორტის საქალაქო სამსახურის ყოფილი უფროსი და სპორტის მინისტრის ყოფილი მოადგილეა. ის ამჟამად საქართველოში არ იმყოფება.
ბესიკ ხარძიანი კუს ტბის ერთ-ერთი მფლობელი იყო. 2011 წლის 16 თებერვალს ბიზნესმენი ნარკოდანაშაულის ბრალდებით აიყვანეს. ამ დროისთვის საჯარო რეესტრის მომდევნო ამონაწერში კუს ტბის მფლობელებს შორის ხარძიანების ოჯახის წევრები აღარ არიან.
ოფიციალური დოკუმენტებით, ბესიკ ხარძიანმა თავისი 29% თითქმის მილიონ ლარად გაყიდა. წილები გაყიდეს მისმა მეუღლემ და ძმამაც.
ხარძიანი ახალი ხელისუფლების პირობებში საპატრიარქოში შედგენილი შესაწყალებელთა სიით გათავისუფლდა. მას შემდეგ ის იწყებს სასამართლო დავას კუს ტბის ქონების დაბრუნების მოთხოვნით. თბილისის საქალაქო სასამართლოში მან ერთი საქმე მოიგო, მეორე კი წააგო.
http://rustavi2.com/ka/news/36961 
ბიზნესმენ ბესიკ ხარძიანის მკვლელობა გახსნილია
