გუგული მაღრაძე: შე კაი ადამიანო, თუ პენსიონერი ხარ, თუ ასაკში ხარ, რაღას ეწევი?!
საპარლამენტო უმრავლესობის წევრი, ქალბატონი გუგული მაღრაძე მხარს უჭერს სიგარეტის გაძვირებას:
– სიგარეტი ადამიანებს კლავს, ყოველ წუთში კვდება 800 ადამიანი, ეს არის ნარკოტიკზე უარესი.
– ქალბატონო გუგული, ნუ მაშინებთ.
– თუ ადამიანებს რაღაცნაირად ხელს შევუწყობთ, რომ სიგარეტს დაანებონ თავი, ამაში ცუდი რა არის?
– გაძვირება ხელშეწყობაა?
– რა თქმა უნდა… მაგალითად, ჩემმა მძღოლმა დაანება თავი და აღმოჩნდა, რომ 120 ლარს ხარჯავდა თვეში. მას რომ თვეში დაეხარჯა 20 ლარი, თავს არ დაანებებდა. მთელმა მსოფლიომ ასე დაიწყო, შენ რა გგონია? 2025 წლისთვის ჩვენთან სიგარეტი უნდა გახდეს 5 ევრო. ჩვენთან ყველაზე იაფია, მთელ მსოფლიოში მწეველთა რაოდენობით პირველ ადგილზე ვართ ჩვენ და რუსები. ვიღაცა იძახდა, ქალბატონო გუგული, თქვენ რა გენაღვლებათ, მაღალი ხელფასი გაქვთო. პირიქით, როცა დაბალი ხელფასი გაქვს, მაშინ უნდა დაანებო თავი, რომ ფულს მოუფრთხილდე.
– ხალხი იმიტომ ეწევა ამდენს, რომ გაჭირვებულია და ნერვიულობს.
– არა, ეგ ტყუილია, ნერვიულობა არაფერ შუაშია, ეს არის უნებისყოფობა, მეტი არაფერი. ბევრგან ნიკოტინი შეყვანილია ნარკოტიკების ნუსხაში. მაშინ ნარკომანსაც ვუთხრათ, ნერვიულობ და ამიტომ იკეთებო. ეს არის ერთ-ერთი გზა, უნდა დაწესდეს საზოგადოებრივი თავშეყრის ადგილებში ჯარიმები, 500 ლარს რომ გადაახდევინებენ, მაგალითად, ორგანიზაციის მეპატრონეს, მერე არავის აღარ მოაწევინებს. ხალხი კიდევ არ არის აზრზე, სიგარეტი რას შვრება. შეიძლება ვიღაცამ მითხრას, აგერ, ერთი კაცი ეწეოდა და არ მოკვდა, ვიღაცა არ ეწეოდა და მოკვდაო, ასე არ არის, 100 მწეველიდან 60 კვდება. ასე დაანებეს ამერიკელებმა თავი, აბა, 1930-იანი წლების კინოები ნახე, ყველას სიგარეტი აქვს პირში გარჭობილი.
– არა, მე გეთანხმებით, რომ ნიკოტინი მავნებელია, მაგრამ თქვენ არ იყენებთ სწორ ფორმას.
– ჩვენ ველოსიპედს ვერ გამოვიგონებთ, რაც გაიარა მთელმა მსოფლიომ, იგივე უნდა გავაკეთოთ ჩვენც.
– რაც მთელმა მსოფლიომ გაიარა სხვა სფეროებში, ჯერ იმას მიხედეთ.
– ყველაზე კარგი არის ეკონომიკური `ნაჟიმი~, უნდა მოუმატო, რომ აღარ მოწიონ. შენ ეწევი?
– დიახ.
– გინდა, გითხრა, როგორ უნდა დაანებო? რამდენი მოგინდება, იმდენი ლარიანი ან 20-თეთრიანი უნდა ჩააგდო ყულაბაში. მერე ნახე, ერთ კვირაში რამდენს დაზოგავ.
– თქვენ პოლიტიკურად წამგებიან განცხადებებს აკეთებთ იმ ქვეყანაში, სადაც პენსია არის 180 ლარი.
– შე კაი ადამიანო, თუ პენსიონერი ხარ, თუ ასაკში ხარ, რაღაზე ეწევი? წადი, ჭამე, სვი, სიგარეტის მაგივრად შოკოლადი იყიდე, ხილი იყიდე, უფრო სასარგებლოა.
– არ არის ასე, დამიჯერეთ, ორგანიზმი ითხოვს.
– არ ითხოვს, ეს არის უნებისყოფობა, ჩვენი სიზარმაცე და სიგლახე. რა ვქნა, ხმა საერთოდ რომ არავინ მომცეს, აზრს მაინც ვერ შევიცვლი. ძალიან ბევრი კარგი გამოხმაურება მოჰყვა ჩემს განცხადებას, ბევრს მოეწონა.
– უარყოფითიც ბევრია.
– უარყოფითი არის უნებისყოფო ხალხისგან. მოდი, მეორე რაღაცა ვთქვათ, მე რომ არ ვეწევი და შენ რომ ეწევი, მე რატომ უნდა ვისუნთქო ნიკოტინი?!
გელა ზედელაშვილი. გაზეთი “ალია”.
http://expressinfo.ge/%E1%83%A1%E1%83%90%E...%83%93%E1%83%90„ჩვენ ველოსიპედს ვერ გამოვიგონებთ, რაც გაიარა მთელმა მსოფლიომ, იგივე უნდა გავაკეთოთ ჩვენც.“ ისა და მთელ მსოფლიოში რომელ ქვეყნებს გულისხმობს ეს პარლამენტარი და მეორეც,იმ ქვეყნებში ესეთი ჭკუათხელი პარლამენტარები არ ჰყავ ვინც ესეთ სულელურ განცხადებებს აკეთებს.
„თუ პენსიონერი ხარ და ხანში ხარ, რა ჩემს ფეხებად გინდა რომ ცოცხლობ?“ მომავალში ეს თქვას ამ ტუტუცმა დედაკაცმა.
შე კაი ადამიანო, თუ პენსიონერი ხარ, თუ ასაკში ხარ, რაღას ეწევი?!
