სახელმწიფო სამხედრო სამეცნიერო-ტექნიკური ცენტრი „დელტა“, რომელიც თავდაცვის სამინისტროს დაქვემდებარებული ორგანიზაციაა, სახელმწიფო შესყიდვის სააგენტოსგან 6 მილიონი ლარის გამარტივებულ შესყიდვებზე ითხოვს ნებართვას.
შესყიდვის კატეგორიები მრავალფეროვანია და მოიცავს როგორც საწვავსა და ნავთობპროდუქტებს, ასევე სამხედრო ტექნიკისათვის საჭირო ნაწილებს, ფეთქებად ნივთიერებებს, სპეციალურ ტანსაცმელს, ელექტრონულ მოწყობილობებსა და სხვადასხვა სამრეწველო მასალას. დოკუმენტში დეტალურად არის ჩამოთვლილი ათობით კლასიფიკატორი, რომელთა შორისაა: სამხედრო მანქანები და მათი ნაწილები, თვითმფრინავები და კოსმოსური ხომალდები, იარაღი და საბრძოლო მასალა, ასევე სეტყვის საწინააღმდეგო სისტემებისთვის საჭირო დანადგარები და აქსესუარები.
„დელტას“ მიერ წარდგენილი დოკუმენტაციის თანახმად, ორგანიზაციისთვის განსაზღვრული მთავარი ამოცანაა ეროვნული სამხედრო მრეწველობის განვითარება და ინოვაციური სამხედრო ტექნოლოგიების დანერგვა. ცენტრი აწარმოებს ისეთ პროექტებს, როგორიცაა „დიდგორი მედევაკი“, „დიდგორი მეომარი“, სეტყვის საწინააღმდეგო სისტემები, უპილოტო საფრენი აპარატები, ჯავშანჟილეტები და ნაღმმტყორცნები. პარალელურად, მიმდინარეობს მეტალურგიული წარმოების გაფართოება, სასწავლო ხელყუმბარებისა და ახალი ცეცხლსასროლი სისტემების დამზადება.
როგორც დოკუმენტშია აღნიშნული, შესყიდვის გამარტივებული ფორმის არჩევა განპირობებულია პროექტების შეზღუდულ ვადებში შეუფერხებლად შესრულების აუცილებლობით. „დელტას“ ხელმძღვანელობა მიუთითებს, რომ წარმოების პროცესში ხშირად იჩენს თავს მოულოდნელი საჭიროებები, რის გამოც შეუძლებელია ყველა მოთხოვნის წინასწარ დაგეგმვა და ტენდერის სტანდარტული წესით ჩატარება.
ცენტრის განმარტებით, თითოეული პროექტის დროული შესრულება არა მხოლოდ თავდაცვის სფეროს, არამედ ქვეყნის ეკონომიკისა და საზოგადოებრივი ინტერესების ნაწილიცაა, რადგან სამხედრო მრეწველობის განვითარება ზრდის ადგილობრივი წარმოების მოცულობას და ხელს უწყობს დასაქმებას.
https://bm.ge/news/delta-shesyidvebis-saage...8JFd4kqZwmBj-sg 
საქართველოს სამხედრო სამრეწველო კომპლექსი, XI
