,,ბლაუენშტაინ საქართველომ“ რაჭაში ფერმერების დახმარების პროექტი დახურა

. ამის შესახებ Bm.ge-ს კომპანიის დირექტორმა, თათია არაბიძემ განუცხადა. როგორც ის განმარტავს, ,,ბლაუენშტაინ საქართველოს პარტნიორ ფერმერთა პროექტი“ კომპანიამ 7 წლის წინ წამოიწყო, რაც რაჭაში ადგილობრივი ფერმერების ხელშეწყობას ისახავდა მიზნად, თუმცა კომპანიამ აღნიშნული პროექტიდან უკვე 1,8 მილიონი ლარი იზარალა.

,, ეს იყო შვეიცარიული მოდელი, რომელსაც ჩვენ ვახორციელებდით. ამ პროექტის ფარგლებში ფერმერებს ვაძლევდით 60 სულიანი საქონლის ფერმის მზა პროექტს, მივყვებოდით მათ ბანკში და ვეხმარებოდით აგროსესხის აღებაში, რაც 95 ათას ლარს შეადგენდა, ვუდგებოდით ამ სესხის თავდებში, რის გამოც რეალურად 140 ათას ლარს ვყინავდით. შემდეგ, თითოეულ მათგანს ვეხმარებოდით 60 ჰექტარი მიწის იჯარით აღებაში, სადაც საქონლისთვის საჭირო თივა უნდა მიეღოთ, ამაშიც ვშუამდგომლობდით სახელმწიფოსთან.

პროექტის ბოლო ეტაპი იყო პირუტყვის გადაცემა, ასევე ვაძლევდით ხორბალს, მარილს, ვეტპრეპარატებს, ვეტერინარულ სამსახურს და ტრანსპორტირებას, წელიწადში ვაძლევდით 14 ათას ლარს, რომელიც მათ ბანკში უნდა გადაეხადათ. ამას ექსკლუზიურ გადასახადს ვეძახდით. შემდეგ უკვე ხდებოდა საქონლის წონის ნამატზე თანხის გადახდა: მოზარდ საქონელზე, თითეულ მომატებულ კილოგრამზე, ვუხდიდით 7 ლარს, მაშინ როცა ბაზარზე კილოგრამი ხორცის ფასი საშუალოდ 5 ლარს შეადგენდა, ზრდასრულ საქონელზე კი - 650 ლარს წელიწადში. ეს იყო აბსოლიტურად სასათბურე პირობები, მაგრამ მიუხედავად ამისა, პროექტმა ვერ გაამართლა. დავასკვენით, რომ ეს ხალხი არ არიან ქმედითუნარიანი ფერმერები“ - განაცხადა თათია არაბიძემ.

მისივე თქმით, პროექტის ფარგლებში 12 ფერმა აშენდა, თუმცა აქედან 9 დაკეტილია და არ ფუნქციონირებს. ,,ბლაუნშტაინ საქართველოს“ მოუწია ამ ფერმერების სესხების დაფარვა და იმ პირგასამტეხლოებისა და ჯარიმების გადახდა, რაც მათ ბანკმა დააკისრა.

,, 1,8 მილიონი - ეს არის ძალიან მსუბუქად დათვლილი ზარალი, აქ შედის მხოლოდ ფინანსური ზარალი და საქონლის წონის კლება, 100 ტონა მარტო ხორცი დავკარგეთ, ანუ 100 ათასი კილოგრამი ხორცი მოაკლებინეს საქონელს, რომელიც ჩვენ ამ ფერმერებს გადავეცით, იმის ნაცვლად რომ მოევლოთ და წონაში მოემატებინათ. ისინი ვერ აღიქვავდნენ სერიოზულად სხვის საქონელს. ვეტპრეპარატებზე და შვეიცარიელი სპეციალისტების ხარჯებზე აღარ ვსაუბრობთ, რომელიც ასევე ამ პროექტის ფარგლებში გავწიეთ“ - განაცხადა თათია არაბიძემ.

მისი განმარტებით, ამჟამად კომპანია აღნიშნულ ფერმერებთან ვალის გასტუმრების სქემაზე აწარმოებს მოლაპარაკებას.

,, ამ წუთში გვაქვს ის რეალობა, რომ ამ ხალხს აქვს ვალის აღიარების ხელშეკრულებები, მათ ჩვენ ამ თანხებს ასე ვერ ვაჩუქებდით, თუმცა ვაძლევთ ყველა ბერკეტს, ვუვადებთ ვალს, ვეუბნებით რომ ეტაპობრივად, თუნდაც 200 ლარის ოდენობით გადაგვიხადონ ეს თანხები, ქირით გადაგვიხადონ, მოკლედ ყველა შანსს ვაძლევთ რომ გაიღვიძონ, თუმცა ამას ვერ ვახერხებთ.


რაჭის რეგიონში ფერმერული მეურნეობა აბსოლუტურად ჩამკვდარია; არადა, დამოუკიდებლად ძალიან გაგვიჭირდება იმ მოცულობის ხორცის წარმოება, რაც გვჭირდება, რადგან მოთხოვნა ჩვენს პროდუქციაზე ძალიან გაზრდილია და უკვე გვიჭირს მისი დაკმაყოფილება. მეცხოველეობას თავისი სპეციფიკა აქვს, რეგიონში მარტო ვერ იქნები დიდხანს, თუ ბევრი ფერმერი არ გაჩნდა, თუ მაღალპროდუქტიული შეჯვარებული საქონელი არ გაჩნდა, დადგება კრიზისი და ჩვენს მოგვიწევს წლების განმავლობაში ორ მაღაზიაზე დარჩენა. ვფიქრობთ, სხვა სქემა ავამუშაოთ, რომელშიც ფერმერები საკუთარ ფინანსურ რესურსს ჩადებენ და იქნებ ამან მაინც გაამართლოს“ - განაცხადა თათია არაბიძემ.


http://www.bm.ge/ka/article/blauenshtain-s...OQC86l3peFYswnc
* * *
ყოფილა თემა
------------------------

This post has been edited by Lаki on 27 Dec 2018, 19:26