„ივანიშვილი მოციქულმა პრემიერმა პარლამენტში მოსვლა ვერ გაბედა... ბახტაძემ კანონი დაარღვია“ - გოცირიძე
2019-06-27 12:31:00
ფრაქცია „ნაციონალური მოძრაობის“ თავმჯდომარე რომან გოცირიძე მიიჩნევს, რომ მამუკა ბახტაძემ ვერ გაბედა იმ დარბაზში შესვლა, რომელშიც გავრილოვი იჯდა და რომელშიც გუშინ პოლიტიკური რეპრესიები დაიწყო. მისივე თქმით, „ოცნებამ“ პრემიერის გადამალვა გადაწყვიტა და სწორედ ამიტომ გადაიდო მისი ანგარიში პარლამენტში, რომელიც დღეს იყო დაგეგმილი.
„პრემიერ-მინისტრმა ვერ გაბედა მოსვლა, პირდაპირ არის ეს კანონის დარღვევა. ვერ გაბედა იმიტომ, რომ რა სინდისით უნდა შემოსულიყო ამ დარბაზში, სადაც ერთი კვირის წინ იყო გავრილოვი, სადაც გუშინ ჩაიდინეს საშინელი უკანონობა, პრაქტიკულად პოლიტიკური რეპრესიების სტარტის მიცემა დაანონსდა ამ დარბაზში. პრემიერს, რომელიც ფაქტობრივად არის ივანიშვილის მოციქული და ფორმალურად ჰქვია მას პრემიერი, ძალიან გაუჭირდებოდა იმ უმძიმეს კითხვებზე პასუხის გაცემა, რომელიც დაგროვდა საზოგადოებაში. გარდა ამისა, დღეს დაინიშნება სულ მალე სასამართლო, რომელიც არის ივანიშვილის ჯიბის სასამართლო და ბუნებრივია, გადაწყვეტილება ის იქნება რასაც უბრძანებს ივანიშვილი. როგორც ჩანს აქვთ ჩანაფიქრი, რომ პრემიერის გადამალვით, ხვალ აქ თეთრი რაშით შემოიყვანონ გიორგი გახარია და გიორგი გახარია წარმოაჩინონ ხელისუფლების მთავარ სახედ და უნდათ ამ დარბაზში ჩამორეცხონ ის სისხლის რომელიც მან დააყენა ქუჩაში,“- განაცხადა რომან გოცირიძემ.
http://www.newposts.ge/wap.php?l=G&ID=208601 
პრემიერმა პარლამენტში მოსვლა ვერ გაბედა, ბახტაძემ კანონი დაარღვია
