2019 წლის 1 სექტემბრიდან ძალაში შევა საგადასახადო კოდექსში შესული ცვლილებები (მუხლი 101), რომლის შედეგადაც, სამსახურების მიერ მათი თანამშრომლებისთვის გამოყოფილი პირადი ავტომობილებით სარგებლობა დასაბეგრ აქტივობად ჩაითვლება. თანხის გადახდის ვალდებულება კი, ყოველთვიური იქნება.
ამის მიზეზია ის, რომ პარლამენტის მიერ მიღებული კანონის მიხედვით, დამქირავებლის ავტომობილის მოხმარებით მიღებული სარგებელი ხელფასად მიიჩნევა, რის გამოც ის საშემოსავლო გადასახადით დაიბეგრება. თუმცა, სახელმწიფო არ გაზომავს იმას, თუ რეალურად რა სარგებელს იღებენ ადამიანები, ვინც სამსახურებრივ ავტომობილებს იყენებენ, ამის ნაცვლად ამ ავტომობილების მოხმარება ფიქსირებული თანხით დაიბეგრება. აღნიშნული თანხა კი, ავტომობილის ძრავის მოცულობაზე იქნება დამოკიდებული.
3500 სანტიმეტრ კუბზე მეტი მოცულობის ძრავის მქონე ავტომობილი - თვეში 300 ლარი;
2500 - 3500 სანტიმეტრ კუბის მოცულობის ძრავის მქონე ავტომობილი - თვეში 200 ლარი;
2500 სანტიმეტრ კუბზე ნაკლები მოცულობის ძრავის მქონე ავტომობილი - თვეში 100 ლარი;
ჰიბრიდული ავტომობილის შემთხვევაში, ნებისმიერი ძრავის მოცულობა - თვეში 60 ლარი.
კანონში გამონაკლისის სახით ჩაიწერა, რომ დაქირავებულის მიერ დამქირავებლის ელექტრომობილის პირადი სარგებლობისათვის გამოყენება საშემოსავლო გადასახადით არ დაიბეგრება.
დაქირავებულის მიერ პირადი სარგებლობისათვის გამოყენებული დამქირავებლის ავტომობილის აღრიცხვისა და საგადასახადო ორგანოსათვის ასეთი ავტომობილის შესახებ ინფორმაციის მიწოდების წესი განისაზღვრება საქართველოს ფინანსთა მინისტრის ბრძანებით.
აღნიშნული თანხის გადახდის ვალდებულება დამქირავებელს ეკისრება.
სამსახურებრივი ავტომობილების რაოდენობის შესახებ დაზუსტებული სტატისტიკა არ არსებობს, რის გამოც წინასწარ უცნობია თუ რა მოცულობის თანხის გადახდა მოუწევთ კომპანიებს ამ ახალი ვალდებულების გამო.
https://www.bm.ge/ka/article/mtavroba-samsa...dabegravs/38265 
მთავრობა სამსახურებრივი ავტომობილების გამოყენებას, დაბეგრავს
