17 წლის წინ, 2004 წლის 1 სექტემბერს შეიარაღებულმა ტერორისტებმა ათასზე მეტი ადამიანი აიყვანეს მძევლად ოსეთის ქალაქ ბესლანის No 1 საშუალო სკოლაში.
კრიზისი 3 დღეს გაგრძელდა და 334 ადამიანის, მათ შორის 186 ბავშვის დაღუპვით დასრულდა. მოსკოვი ჩეჩენ სეპარატისტებს ადანაშაულებს ამ ტრაგედიაში.
ტრაგედიის შემდეგ კრემლი ამტკიცებდა, რომ თითქოს ჩეჩნებს არ ჰქონდათ არანაირი მოთხოვნა და არც მოლაპარაკებაზე წამოსულან მძევალთა გასათავისუფლებლად.
თუმცა მოგვიანებით ყველამ შეიტყო, რომ მოსკოვმა უარი თქვა მოლაპარაკებაზე ჩეჩენ მოიერიშეებთან, რომლებიც ჩეჩნეთიდან ფედერალური ჯარის გაყვანას მოითხოვდნენ.
გაზეთ "იზვესტიისათვის" მიცემულ ინტერვიუში, ოსეთის ყოფილმა პრეზიდენტმა ალექსანდრ ზასოხოვმა განაცხადა, რომ რუსეთის უშიშროების უწყების წარმომადგენლები დაპატიმრებით დაემუქრნენ, თუ იგი ბესლანის სკოლაში მივიდოდა და დაელაპარაკებოდა ჩეჩენ მოიერიშეებს.
კრემლმა ასლან მასხადოვის მიერ შეთავაზებული შუამავლობაც უარყო, ხოლო შემდეგ მისი რამდენიმე ნათესავი დააპატიმრა.
რუსეთის ხელისუფალნი აცხადებდნენ, რომ არ ჰქონდათ დაგეგმილი სკოლის შენობის იერიშით აღება, და რომ იერიში მიტანილ იქნა დაახლოებით 13 საათზე ადგილობრივი დროით, მას შემდეგ, რაც ექსტრემისტებმა სკოლის სპორტულ დარბაზში შეტანილი ასაფეთქებელი მოწყობილობები აამოქმედეს.
ხოლო შამილ ბასაევმა ტელეკომპანია "ეიბისისათვის" მიცემულ ინტერვიუში განაცხადა, რომ პირველი ასაფეთქებელი მოწყობილობა ამოქმედდა მას შემდეგ, რაც რუსმა სნაიპერმა
ესროლა ექსტრემისტს, რომელსაც ფეხი ერთ-ერთი ასაფეთქებელი მოწყობილობის დეტონატორზე ჰქონდა დაჭერილი.
ყოფილი მძევლები და სხვა თვითმხილველნი დარწმუნებულნი არიან იმაში, რომ ესოდენ დიდი მსხვერპლი იმითაა გამოწვეული, რომ რუსებმა სკოლის შტურმის დროს მძიმე შეიარაღება გამოიყენეს.
ნაცვლად იმისა რომ პუტინს დაღუპულთა ოჯახის წევრებისთვის ბოდიში მოეხადა და მხარში დადგომოდა, ტრაგედიის პირველივე დღიდან მათი შევიწროვება დაიწყო, რათა მსოფლიოსთვის დაემალა ის გარემოებები რამაც გახადა ეს უმძიმესი ტრაგედია ასეთი მასშტაბური...
მიმაგრებული სურათი
17 წელი ბესლანის ტრაგედიიდან
