https://www.bpn.ge/article/139706-sakartvel...an-nacils-iset/„საქართველო კარგავს ახალგაზრდა და ეკონომიკურად აქტიური მოსახლეობის მნიშვნელოვან სეგმენტებს“, - ამის შესახებ აღნიშნულია ISET-ის კვლევაში, სადაც საქართველოში მიგრაციის ტენდენციებია მიმოხილული.
უფრო კონკრეტულად, პუბლიკაციის თანახმად, 2012 წლიდან 2021 წლამდე საქართველოს მოქალაქეთა ემიგრაცია სტაბილურად აჭარბებდა იმიგრაციას, რის შედეგადაც შენარჩუნებული იყო მიგრაციის უარყოფითი წმინდა ბალანსი. მოგვიანებით პროცესები პანდემიის გამო შეზღუდულმა გადაადგილებამ შეანელა, თუმცა, 2021 წლიდან საქართველოს მოქალაქეების მიერ ქვეყნის დატივების ტენდენცია გაგრძელდა.
„2021 წლიდან საქართველოს მოქალაქეების გადინება განახლდა და გაძლიერდა, პიკს მიაღწია 2023 წელს 163 140 ემიგრანტით - რაც ორჯერ მეტია 2021 წელს დაფიქსირებულ რაოდენობაზე. ეს დრამატული ზრდა ძირითადად განპირობებული იყო ბავშვებისა და ახალგაზრდების წმინდა ემიგრაციის ზრდით, განსაკუთრებით 0-19 ასაკობრივ ჯგუფში (სულ 63 567 ადამიანი, რაც 2023 წელს საქართველოს მთლიანი წმინდა ემიგრაციის 89%-ს შეადგენდა). ამ ჯგუფში ჭარბად იყვნენ წარმოდგენილნი 10-14 წლის ბავშვები, კერძოდ, ამ პერიოდში ემიგრაციაში თითქმის 35 000 ბავშვი წავიდა.
ამასთანავე, ISET-ის მიერ ასაკობრივი ჯგუფების მიხედვით დაყოფილი ანალიზი აჩვენებს, რომ 55 წლამდე ასაკის საქართველოს მოქალაქეები მუდმივად განიცდიან წმინდა ემიგრაციას, აქედან 15-19 წლის ასაკობრივ ჯგუფში საშუალო წმინდა გადინება ყველაზე მაღალია.
„ეს ტენდენცია აჩვენებს, რომ საქართველო კარგავს ახალგაზრდა და პოტენციურად ეკონომიკურად აქტიური მოსახლეობის მნიშვნელოვან ნაწილს. ამის საპირისპიროდ, წმინდა მიგრაცია დადებითი ან მხოლოდ უმნიშვნელოდ უარყოფითი ხდება 55 წლის და უფროსი ასაკის მოქალაქეებში, რაც მიუთითებს ხანდაზმულ ჯგუფებში ემიგრაციისადმი დაბალ მიდრეკილებაზე ან დაბრუნების მიგრაციის ზომიერ ხარისხზე. მეორეს მხრივ, უცხოელი მოქალაქეებისთვის წმინდა იმიგრაცია ყველაზე გამოხატულია 20-39 წლის ასაკობრივ ჯგუფში“, - აღნიშნულია პუბლიკაციაში.
კვლევაში საუბარია უცხო ქვეყნის მოქალაქეების მიერ საქართველოში გაზრდილ მიგრაციაზეც. კერძოდ, აღნიშნულია, რომ მათ საქართველოს წმინდა მიგრაციის ბალანსში საანგარიშო პერიოდში (გარდა 2020 წლისა) მნიშვნელოვანი წვლილი შეიტანეს.
„იმიგრაციის მკვეთრი ზრდა 2022 წელს დაფიქსირდა, რაც დაემთხვა რუსეთის მიერ უკრაინაში სრულმასშტაბიან შეჭრას. ამან გამოიწვია რუსეთიდან, ბელორუსიიდან და უკრაინიდან ადამიანების მნიშვნელოვანი შემოდინება, რომელთა უმეტესობა, სავარაუდოდ, კონფლიქტსა და სამხედრო სამსახურში გაწვევას გაურბოდა. ტენდენცია გაგრძელდა 2023 და 2024 წლებში, თუმცა თანდათანობით შემცირებული რაოდენობით. 2015 წლიდან 2024-წლამდე ყველაზე დიდი წმინდა იმიგრაციის ნაკადები დაფიქსირდა რუსეთის ფედერაციიდან (+97 090), უკრაინიდან (+27 152) და აზერბაიჯანიდან (+14,251)“, - ვკითხულობთ ISET-ის კვლევაში.
საქართველო კარგავს ახალგაზრდა, ეკონომიკურად აქტიური მოსახლეობას
