სტუდია მონიტორის მიერ ჩატარებული გამოძიების მიხედვით, მდინარაძე და გელაშვილი ერთმანეთს წლების წინ შინაგან საქმეთა სამინისტროში მუშაობის დროს დაუახლოვდნენ. სამსახურის შემდეგ მათი ურთიერთობა არ შეწყვეტილა - ერთად გადავიდნენ კერძო სექტორში, დაიწყეს საადვოკატო საქმიანობა, დააფუძნეს საერთო კომპანიები და არასამთავრობო ორგანიზაციები.
ამავე პერიოდში, გიორგი გელაშვილის ოჯახის წევრები ეტაპობრივად ჩნდებიან სახელმწიფო სტრუქტურებში. მისი მეუღლე დასაქმდა პარლამენტში, სწორედ მაშინ, როცა მამუკა მდინარაძე უკვე უმრავლესობის ლიდერი იყო. მოგვიანებით მან მუშაობა გააგრძელა სხვა მაღალ პოზიციებზე, მათ შორის ფინანსთა სამინისტროს საგამოძიებო სამსახურში. სახელმწიფო სამსახურში აღმოჩნდა გელაშვილის შვილიც - ახალგაზრდა ასაკში, ჯერ პარლამენტის ადმინისტრაციაში, შემდეგ კი მთავრობის კანცელარიაში.
ყველა ეს დანიშვნა ხდება იმ დროს, როცა მამუკა მდინარაძე ხელისუფლებისთვის ერთ-ერთი ყველაზე გავლენიანი ფიგურაა. საჯარო რეესტრის მონაცემები და ოფიციალური დოკუმენტები აჩვენებს, რომ მეგობრობა, ბიზნესკავშირები და სახელმწიფო კარიერა პარალელურად ვითარდება და ერთმანეთთან მჭიდროდ არის გადაჯაჭვული.
ამ ისტორიაში მთავარი კითხვა სწორედ აქ ჩნდება: არის ეს უბრალოდ დამთხვევა, თუ ძალაუფლების მქონე პირების პირადი წრის სისტემური გაძლიერება სახელმწიფო რესურსების გამოყენებით? მაშინ, როცა ხელისუფლება კორუფციასთან ბრძოლაზე საუბრობს, მსგავსი კავშირები საზოგადოებაში ნეპოტიზმის და შერჩევითი მართვის ეჭვებს აჩენს.
წყარო: სტუდია მონიტორი
დეტალური ინფორმაცია ბმულზე:
https://monitori.ge/korufciustan-sheuwynarebeli-mamuka.../ 
როგორ მიათრევს სახელმწიფო აპარატში რეჩკინი საძმოს, ნეპოტიზმი - კორუფციასთან შეუწყნარებელ რეჩკინზე
